Հանրության լայն շրջանակների համար բացվել է Դեթրոյթի (ԱՄՆ, Միչիգան) ամենամյա ավտոմոբիլային շոուն: Կազմակերպիչները հույս ունեն, որ այն ավելի քան 800 հազար այցելու կունենա:
Ավտոշոուն Դեթրոյթում անցկացվում է արդեն 108-րդ անգամ: Այն բացվել է երկուշաբթի, սակայն, ավանդույթի համաձայն, առաջին օրերին աշխատել է միայն մամուլի ներկայացուցիչների եւ մասնագետների նեղ շրջանակի համար:
Cobo Center ցուցահանդեսային համալիրում, ընդհանուր առմամբ, 55 համաշխարհային եւ հյուսիսամերիկյան ցուցադրություն է կայացել: Նորույթների թվում սպորտային մեքենաներ են, քրոսովերներ եւ ամերիկացիների շրջանում մեծ տարածում վայելով փիքափներ:
Ճապոնական Honda կոնցեռնը ներկայացրել է վերածնված Acura NSX-ը: Ընկերությունն ակնկալում էր, որ այն մրցակցելու է Porsche-ի եւ Ferrari-ի հետ, սակայն վաճառքի ցածր ցուցանիշների պատճառով 2005 թվականին մեքենայի արտադրությունը կանգնեցվեց: 2012 թվականին Դեթրոյթում ներկայացվեց թարմացված NSX-ի կոնցեպտը, իսկ արդեն այս տարի, ըստ ՏԱՍՍ-ի, սկսվելու է դրա վաճառքը:
Ամերիկյան Ford կոնցեռնը սպորտային մեքենաների սիրահարներին միանգամից մի քանի նորույթ է ներկայացրել: Դրանց թվում են 2003-2006 թվականներին թողարկված GT-ն, եւ թարմացված Mustang GT350R-ը, որը, ինչպես ակնկալվում է, լրջորեն մրցակցելու է General Motors-ի լեգենդար Chevrolet Camaro-ի հետ:
Իրենց նորույթներն են ներկայացրել նաեւ անցյալ տարի ամերիկյան շուկա վերադարձած իտալական Alfa Romeo-ն, ինչպես նաեւ Cadillac, Lexus, Infiniti, Mini եւ այլ արտադրողները: Դեթրոյթի ավտոշոուի այս տարվա ամենասպասված դեբյուտներից է եղել նաեւ երկրորդ սերնդի Chevrolet Volt-ը:
