Սպիտակ շաքարի ներմուծման մաքսատուրքը եւս երկու տարի Հայաստանում կպահպանվի իր նախկին 10%-ի մակարդակում: Համապատասխան որոշումն ընդունել այսօր՝ հունվարի 22-ին, կառավարության նիստի ընթացքում: Նկատենք, որ ներկայումս սպիտակ շաքարավազի ԵՏՄ-ի միասնական մաքսատուրքը տոննայի դիմաց կազմում է 340 դոլար կամ արժեքի 70%-ը:

Հայաստանի էկոնոմիկայի նախարար Կարեն Ճշմարիտյանը հստակեցրել է, որ այս որոշումը վերաբերում է գազային ըմպելիքներ արտադրող ընկերություններին՝ Coca Cola Hellenic Bottlers Armenia եւ Jermuk International Pepsi Cola Bottler-ին, որոնք շաքարավազը ներմուծում են ինքնուրույն արտադրության համար: Այդ ընկերություններին անհրաժեշտ շաքարավազի քվոտան հաստատվել է տարեկան 4 հազար տոննա ծավալում: Քվոտաների 90%-ը կարող են ստանալ «կոլան» եւ «պեպսին», իսկ 10%-ը՝ ոլորտի ցանկացած ընկերություն:

Նկատենք, որ 2013թ. Հայաստանը 61,7 հազար լիտր  ոչ ալկոհոլային ըմպելիք է արտադրել: Համեմատության համար նշենք, որ 2012թ. այդ ցուցանիշը կազմել է 45,3 հազար լիտր: (Աճը հիմնականում պայմանավորված է վերոնշյալ երկու գործարանների արտադրության ընդլայնմամբ):