Դատելով պաշտոնական հաղորդագրություններից՝ ընթացիկ տարում Ռուսաստանում բենզինն ու դիզելային վառելիքը 10%-ով թանկանալու է:
Անցյալ տարվա հունվար-սեպտեմբերին արտահանվող «նավթամթերքի» ընդհանուր ծավալում Ռուսաստանի մասնաբաժինը մեկ տարվա ընթացքում ավելացել է 36.2 տոկոսային կետով՝ արդյունքում հասնելով 68.2%-ի: Այսպիսով, ռուսական բենզինի թանկացումը, անկասկած, կազդի մեր երկրում բենզինի գնի վրա (հաշվի առնելով Ռուսաստանի մասնաբաժինը):
Ինչո՞ւ համաշխարհային շուկայում նավթի գինը գրեթե 2 անգամ էժանացել է, իսկ Ռուսաստանում բենզինի գները կանոնավորապես աճում են: Ռուսական անկախ փորձագետներն այս ֆենոմենը բացատրում են նավթի եւ նավթամթերքի շուկայում մրցակցության բացակայությամբ, ինչն ընկերություններին թույլ է տալիս չափազանց բարձր եկամուտ ստանալ:
Ռուսաստանում վերամշակվում է երկրում արդյունահանվող նավթի կեսից ավելին: Ընդ որում, այդ հումքի զգալի մասն իրացվում է հորիզոնական ինտեգրված նավթային ընկերությունների ներսում: Այս հանգամանքը վերջիններին հնարավորություն է ընձեռում առեւտրային շարժի ամբողջ շղթայից եկամուտ ստանալ:
Եթե ռուսական բենզինը թանկանա 10%-ով (կամ ավելի…), ապա մեր ներկրողներն ի՞նչ այլընտրանք կունենան: Նրանք կարող են ավելացնել երրորդ երկրներից ներկրումը, ասենք՝ Ռումինիայից, Բուլղարիայից եւ այլն: Այդ դեպքում ներկրողները ստիպված կլինեն 5% մաքսատուրք վճարել, որը նախատեսված է Եվրասիական տնտեսական միությունում: Իհարկե, ավելի լավ է 5% ավելի վճարել, քան 10%...
Վերջին տվյալների համաձայն, բենզինի էժանության առումով Ռուսաստանն աշխարհի 161 երկրների շարքում զբաղեցնում է 19-րդ տեղը (միջին գինը 0.54 դոլար՝ 1 լիտրի դիմաց), իսկ Հայաստանը՝ 93-րդ տեղը (1 լիտրը՝ 1.17 դոլար):
Որպես տեղեկանք: Հարեւան Վրաստանն այս ցանկում 60-րդ տեղում է. այս երկրում բենզինի մեկ լիտրն արժե 0.99 դոլար: Վարկանիշի վերին հորիզոնականներում Ռուսաստանի «առաջընթացն» ուղղակիորեն կապված է երկրում դոլարի կտրուկ ամրապնդմամբ: