Քաջարանի բժշկական կենտրոնում հեպատիտ С-ով վարակվելու գործի շրջանակում վեց մարդ տուժող է ճանաչվել: Այս մասին NEWS.am-ի թղթակցին հայտնեց Հայաստանի Քննչական կոմիտեի նախագահի խորհրդական Սոնա Տռուզյանը:
Ըստ նրա՝ ներկա պահին պահանջել են ներկայացնել տուժածների հիվանդության պատմությունը, նշանակվել են դատաբժշկական փորձաքննություններ:
Ավելի վաղ կայացած մամուլի ասուլիսում ՀՀ գլխավոր վարակաբան Արա Ասոյանը հայտնել էր, որ Քաջարանում հեպատիտ С-ով վարակված հիվանդները բուժման համար չեն վճարելու՝ հիվանդության քրոնիկ շրջան անցնելու դեպքում: Երրորդ անձը, որի անունը գաղտնի է պահվում, պատրաստակամություն է հայտնել անհրաժեշտության դեպքում վճարել բոլոր բուժծախսերը: Վարակվածներից շատերը Զանգեզուրի պղնձամոլիբդենային կոմբինատի աշխատակիցներն են եւ բժշկական ապահովագրություն ունեն: Սակայն անկախ ապահովագրության առկայությունից կամ բացակայությունից, նրանց բուժումն անվճար է լինելու:
Ըստ առողջապահության նախարարության տվյալի՝ 2014 թ. Քաջարանի բժշկական կենտրոնում վիրահատվել է 191 մարդ, նրանցից եւ հիվանդանոցի բուժանձնակազմից արյան նմուշներ են վերցվել, որոնք ուղարկվել են Երեւան՝ վարակի հայտնաբերման հետազոտության համար:
