Թուրքիայում հայտնի ընդդիմադիր գործիչը պնդում է, որ երկրի կառավարությունը Ցեղասպանության 100-րդ տարելիցի մոտենալու հետ պատրաստվում է հայերին որոշ հողեր առաջարկել:
Ըստ թուրքական «Today's Zaman» պարբերականի, «Ազգայնական շարժում» կուսակցության փոխնախագահ Օքթայ Վուրակը, մասնավորապես, հայտարարել է. «Ես գիտեմ, որ իշխող Արդարություն եւ զարգացում կուսակցությունն ընթացիկ ծրագիր ունի: Մի պրոֆեսոր խորհրդատվություն է տրամադրում եւ աշխատում է հայերին հողեր փոխանցելու հարցի շուրջ»:
Ասելով, որ հայկական սփյուռքը հավակնություններ ունի Անկարայում նախագահի նախկին նստավայրի եւ Ստաբուլի Եշիլքյոյ շրջանի որոշ հողերի նկատմամբ, Վուրալը հարցադրում է արել, արդյո՞ք զուգադիպություն է, որ կառավարությունն ավելի վաղ հայտարարել է Ստամբուլի Աթաթուրքի անվան օդանավակայանը Եշիլքյոյի շրջան փոխադրելու մասին:
Նախագահի նախկին նստավայրը, որը հայտնի է որպես Չանքայա, նախագահական պալատ էր մինչեւ Թուրքիայի նախագահի պաշտոնում Ռեջեփ Թայիփ Էրդողանի ընտրվելը: Էրդողանը հիմա ապրում է նոր կառուցված նստավայրում, իսկ Չանքայան փոխանցվելու է վարչապետին:
«Արդյո՞ք Աթաթուրքի անվան օդանավակայանն ու նախագահական պալատը կտան՝ հայկական սփյուռքի պահանջները բավարարելու համար: Արդյո՞ք զուգադիպություն է, որ նրանք այնտեղից հեռանում են հենց այդ ժամանակ»,- ասել է Վուրալը: