Հայոց Ցեղասպանության 100-րդ տարելիցին ընդառաջ Արարատյան հայրապետական թեմի երիտասարդաց միությունների նախաձեռնությամբ Երեւանի քաղաքապետարանի ճեմասրահում բացվել է «Մշակութային ցեղասպանություն» խորագրով լուսանկարների ցուցահանդեսը: Երեւանի քաղաքապետարանի տեղեկատվության եւ հասարակայնության հետ կապերի վարչությունից հայտնում են, թե միջոցառմանը ներկա են գտնվել Երեւանի քաղաքապետ Տարոն Մարգարյանը, ԱՀԹ առաջնորդական փոխանորդ Տ. Նավասարդ արքեպիսկոպոս Կճոյանը, բազմաթիվ երիտասարդներ, հյուրեր: Ներկաներին ուղղված իր ողջույնի խոսքում Տ. Նավասարդ արքեպիսկոպոս Կճոյանը շնորհակալություն է հայտնել Երեւանի քաղաքապետին թեմի երիտասարդաց միությունների նախաձեռնություններին աջակցելու համար, նկատելով, որ Երեւանի քաղաքապետարանի եւ Արարատյան հայրապետական թեմի միջեւ ձեւավորված համագործակցությունն իսկապես արդյունավետ է ու հաջողված:
Ճեմասրահում ցուցադրված խորհրդանշական 24 լուսանկարներում ներկայացված են Արեւմտյան Հայաստանի խոնարհված սրբավայրերն ու կոթողները: Տ. Նավասարդ արքեպիսկոպոս Կճոյանի եւ լուսանկարների հեղինակ Տաթեւ Մելքոնյանի ուղեկցությամբ քաղաքապետ Տարոն Մարգարյանը շրջել է ճեմասրահում, ծանոթացել ներկայացված լուսանկարներին: