Fred Olsen ընկերության Boudicca զբոսաշրջային նավը շարժիչների հատվածում հրդեհի հետեւանքով Կասաբլանկայի (Մարոկկո) ափերին կորցրել է կառավարումը: Այս մասին գրում է Breaking Travel News-ը:
Միջադեպը տեղի է ունեցել վաղ առավոտյան: Հյուրերն ու անձնակազմի անդամները չեն տուժել: «Boudicca-ի աշխատանքն ամբողջությամբ վերականգնվել է, եւ մարդկանց որեւէ վտանգ չի սպառնում: Ներկայում նավում 784 զբոսաշրջիկ եւ անձնակազմի 356 անդամ կա: Միջադեպից հետո անձնակազմը շտկումներ է մտցրել երթուղում, որպեսզի նավը տեղ հասնի ըստ նախապես սահմանված ժամանակացույցի»,- նշել են ընկերությունում:
Ըստ Lenta-ի, Boudicca նավը հունվարի 20-ից բրիտանական Սաութհեմփթոն քաղաքից 18-օրյա շրջագայության էր ուղեւորվել դեպի Կանարյան կղզիներ եւ Կաբո Վերդե: Շաբաթ՝ հունվարի 24-ին, այն դուրս էր իսպանական Քադիսից եւ առավոտյան պետք է հասներ կանարյան Լանսարոտե կղզի: