Մեծ Բրիտանիայում առաջին կին եպիսկոպոսի ձեռնադրումը տեղի կունենա Յորքի աբբայությունում. Օքսֆորդն ավարտած փոխանորդ Լիբի Լեյնը կոչվելու է Սթոքփորթի եպիսկոպոս:
Առաջին կին եպիսկոպոսի անունը հրապարակվել է դեկտեմբերի 17-ին: Լեյնն այն ժամանակ խոստովանել էր, որ մեծ ուրախություն է զգում, այդ օրը պատմական է կոչել Անգլիայի եկեղեցու համար եւ շնորհակալություն հայտնել բոլորին, ովքեր ներդրում են ունեցել կանանց՝ եպիսկոպոս ձեռնադրվելու իրավունքի մասին օրենքն ընդունելու գործում:
Լեյնին եպիսկոպոս է ձեռնադրելու Յորքի արքեպիսկոպոս Ջոն Սենթամուն:
Լեյնը սարկավագ էր ձեռնադրվել 1993 թ., քահանա՝ 1994 թ.: Մինչեւ այս պահը նա Չեսթեր կոմսության եկեղեցու փոխանորդն էր: Լեյնի ամուսին Ջորջը Մանչեսթրի օդանավակայանի եկեղեցու կապելանն է:
Անգլիայի եկեղեցին կանանց՝ եպիսկոպոս ձեռնադրվելու իրավունքի մասին օրենքն ընդունել էր նոյեմբերի 17-ին, երբ գլխավոր սինոդը Church House-ում վերջնական քվեարկություն էր անցկացրել: Հուլիսի կեսերին Սինոդի անդամների երկու երրորդը կողմ էին քվեարկել, որն էլ վճռել էր պահպանողականների եւ փոփոխությունների կողմնակիցներրի միջեւ վեճի ելքը, փոխանցում է «ՌԻԱ Նովոստին»:
Կանայք սկսել էին քահանա ձեռնադրվել դեռեւս 1994 թ.-ից, սակայն եկեղեցական բարձր պաշտոններ չէին կարողանում զբաղեցնել: Լեյնից բացի, կան կին եպիսկոպոսի եւս մի քանի թեկնածուներ: Կին եպիսկոպոսների գաղափարին նախկինում կողմ էր արտահայտվել Մեծ Բրիտանիայի վարչապետ Դեյվիդ Քեմերոնը:
