Արարատի մարզպետարանի աշխատակիցները շատ ծանր ու նյարդային են տանում մարզպետի պաշտոնից Վարդգես Հովակիմյանի հրաժարական տալու որոշումը: Նրանցից շատերի համար հրաժարականի որոշումը անակնկալ էր, քանի որ մինչեւ երեկ աշխատանքային օրվա ավարտը Հովակիմյանը հրաժարական չէր ներկայացրել, սակայն նրա հրաժարականի հարցը ներառված է եղել կառավարության հուլիսի 15-ի նիստի օրակարգում: Այս տեղեկությունը հաստատեց նաեւ Հովակիմյանի խորհրդական Ալբերտ Յակուբովը: Նա NEWS.am-ի թղթակցի հետ զրույցում ասել է, թե երբ ինքը երեկ երեկոյան հարցրել է մարզպետին՝ ճի՞շտ է իր հրաժարականի մասին տեղեկությունը, Հովակիմյանը կտրուկ արձագանքել է՝ «Իհարկե ոչ»: Ի դեպ, Յակուբովը նշեց, որ մի քանի օր առաջ մարզպետը պաշտոնապես հրավիրված է եղել մասնակցելու այսօր՝ հուլիսի 14-ին Ֆրանսիայի դեսպանատանը կազմակերպված հանդիսավոր արարողությանը՝ նվիրված Ֆրանսիայի ազգային տոնին: Երեկ Յակուբովն ու Հովակիմյանը միասին աշխատել են այն ուղերձի վրա, որը մարզպետը պետք է տոնի առթիվ ուղարկեր դեսպանատանը:
NEWS.am-ի տեղեկություններով՝ Հովակիմյանին միայն ուշ երեկոյան՝գիշերվան մոտ են հրաժարականի դիմում գրել տվել, քանի որ կառավարության նիստերի օրակարգում արդեն իսկ ներառված է եղել հրաժարականի հարցը: Ի դեպ, Հովակիմյանի հրաժարականի հարցը կառավարությունում քննարկվել է դեռ ամիսուկես առաջ, եւ արդեն իսկ նախանշված է եղել այն թեկնածուն, ով այդ պաշտոնում պետք է փոխարինի Հովակիմյանին: NEWS.am-ն արդեն տեղեկացրել է, որ մարզպետի նոր թեկնածուն ՀՀ արտակարգ իրավիճակների նախարարի տեղակալ Էդիկ Բարսեղյանն է, ով, ըստ մեր աղբյուրների, շատ լավ հարաբերությունների մեջ է իշխանական վերնախավի հետ եւ վայելում է փոխվարչապետ Արմեն Գեւորգյանի համակրանքը: Հենց նրա կողմից իրականացված լոբբինգի հետեւանքով էլ որոշում է կայացվել Վարդգես Հովակիմյանին հրաժարականի դիմում գրել տալ: Մեր տեղեկություններով, սկզբում որոշում է կայացվել այդ պաշտոնում նշանակել ԱԺ խոսնակ Հովիկ Աբրահամյանի եղբորը, սակայն Հովիկ Աբրահամյանն ինչ-ինչ պատճառներով փորձել է եղբոր թեկնածությունը ետ պահել այդ պաշտոնում նշանակվելուց:
Ի դեպ, երբ հայտնի է դարձել, որ հենց Էդիկ Բարսեղյանը պետք է դառնա Արարատի նոր մարզպետ, նա առանց հապաղելու դիմել է՝ անդամագրվելու Հանրապետական կուսակցությանը: Լուրն այս մասին հաստատեցին ՀՀԿ-ում:
Նշենք, որ որպես Հովակիմյանի հրաժարականի պատճառ նշվում է նրա վատ աշխատանքը, բայց ոչ թե մարզպետի պաշտոնում, այլ՝ մարզում կուսակցական գործունեություն իրականացնելիս: Ըստ լուրերի, մարզում վերջին շրջանում էապես մեծացել է ԲՀԿ-ի ազդեցությունը, եւ ընդհակառակը, թուլացել ՀՀԿ-ի դիրքերը, ինչն էլ դժգոհություն է առաջացրել իշխանական վերնախավում՝ նկատի ունենալով այն հանգամանքը, որ Արարատի մարզը մշտապես համապետական ընտրություններում մեծաթիվ ձայներ է ապահովել ՀՀԿ-ի համար:
Ի դեպ, NEWS.am-ը փորձեց պարզել նաեւ, թե ինչո՞վ է զբաղվելու Վարդգես Հովակիմյանը պաշտոնանկությունից հետո: Նրա խորհրդականն ասաց, թե տեղյակ չէ Հովակիմյանի պլանների մասին, իսկ հարցին, թե պատրաստվո՞ւմ է որպես խորհրդական աշխատել նոր մարզպետի հետ՝ արձագանքեց. «Չեմ կարող ասել, պետք է ինքը ցանկանա, որ աշխատեմ, եթե չցանկանա, ինչպե՞ս կարող եմ աշխատել»:
Նշենք, որ Վարդգես Հովակիմյանը մի քանի բիզնեսներ ու խանութների ցանց ունի: Նրան են պատկանում Արտաշատի «Պարտեզ» տաքսի սերվիսը, Արտաշատում տեղակայված «Եվրոպա» հանրախանութը: