Հայաստանը 2014 թվականին ակտիվորեն մասնակցել է Եվրոպայի Խորհրդի տարբեր կառույցների աշխատանքներին` միեւնույն ժամանակ շարունակելով իր ներգրավվածությունը կազմակերպության գործունեության համար կարեւոր նշանակություն ունեցող ԵԽ բարեփոխումների գործընթացում: Այդ մասին նշվում է ՀՀ ԱԳՆ տարեկան հաշվետվությունում:
ՄԱԿ-ի Գլխավոր ասամբլեայի 69-րդ նստաշրջանի շրջանակներում ՀՀ նախագահը հանդիպում է ունեցել Եվրոպայի խորհրդի գլխավոր քարտուղար Թորբյորն Յագլանդի հետ:
Հունիսին Հայաստան են այցելել ԵԽԽՎ մոնիտորինգային հանձնաժողովում Հայաստանի պարտավորությունների հարցով համազեկուցողները, իսկ հոկտեմբերին՝ ԵԽ մարդու իրավունքների հանձնակատար Նիլս Մուիժնիկսը:
Առաջընթաց է արձանագրվել Հայաստան-Եվրոպայի Խորհուրդ 2012-2014թթ. Գործողությունների ծրագրի իրականացման հարցում: Նոյեմբերին ԵԽ քարտուղարության հետ կայացել են նոր՝ 2015-2017թթ. Գործողությունների ծրագրի մշակման բանակցությունները:
Մարտին ԵԽ տեղական եւ տարածաշրջանային իշխանությունների կոնգրեսը ընդունել է «Տեղական ժողովրդավարությունը Հայաստանում» զեկույցը, որում ներառված առաջարկությունների իրականացման նպատակով ԵԽ կոնգրեսի հետ ձեռնարկվել է հետմոնիտորինգային երկխոսության գործընթաց:
Հայաստանի ներկայացուցիչները մասնակցել են Եվրոպայի խորհրդի տարբեր ատյանների շրջանակներում ԵԽ անդամ երկրներում եւ Հայաստանում անցկացված ավելի քան 60 համաժողովների, միջկառավարական կոմիտեների նիստերի, աշխատաժողովների եւ քննարկումների:
