2014 թ. առաջին անգամ խորհրդարանական մակարդակով Արցախի ինքնորոշման իրավունքը սատարող բանաձեւ է ընդունվել Եվրոպական մայրցամաքում, մասնավորապես, Բասկերի Երկրի խորհրդարանի կողմից։ Այս մասին այսօր՝ հունվարի 26-ին, իր տարեկան ամփոփիչ մամուլի ասուլիսի ժամանակ հայտարարել է Լեռնային Ղարաբաղի Հանրապետության արտաքին գործերի նախարար Կարեն Միրզոյանը:
«ԼՂՀ-ն անկախ պետություն ճանաչելու մասին հայտարարել է նաեւ Բասկերի երկրի Գիպուսկոա նահանգի նախագահը: Աշնանը Նավարայի (Իսպանիայի ինքնավար մարզ) խորհրդարանի խոսնակների խորհուրդը հանդես է եկել պաշտոնական հայտարարությամբ առ այն, որ Լեռնային Ղարաբաղի իշխանությունները պետք է պարտադիր կողմ հանդիսանան ցանկացած բանակցային ձեւաչափի, որը կարող է վճռորոշ դերակատարություն ունենալ երկրի ապագայի համար»,- ասել է նախարարը:
Նրա խոսքով՝ ԼՂՀ միջազգային ճանաչման գործընթացում նոր զարգացումներ են գրանցվել ԱՄՆ-ում։ Ռոդ Այլենդից, Մասաչուսեթսից, Մենից եւ Լուիզիանայից հետո ամերիկյան Կալիֆորնիա նահանգը դարձել է հինգերորդը, որն ընդունել է Արցախի ժողովրդի ինքնորոշման իրավունքը սատարող բանաձեւ։
Կարեն Միրզոյանը հայտնել է նաեւ, որ նախորդ տարի ընդլայնվել են Արցախի եւ օտարերկրյա տարբեր համայնքների միջեւ ապակենտրոնացված համագործակցության շրջանակները: Բարեկամության հռչակագրեր են ստորագրվել Ֆրանսիայի Վիեն, Բուրգ լե Վալանս, Բուկ Բել Էր եւ Արցախի Հադրութ, Շուշի եւ Ասկերան քաղաքների միջեւ: Քարվաճառի եւ Հադրութի հետ բարեկամական հարաբերությունների հաստատման մասին նման հռչակագրեր են ընդունվել նաեւ ամերիկյան Պիկո Ռիվերա եւ Բըրբանք քաղաքների կողմից: Համագործակցության մասին Համաձայնագիր է ստորագրվել նաեւ Ստեփանակերտի եւ Դոնոստիայի միջեւ (Բասկերի Երկիր):