Լոռու մարզի ընդհանուր իրավասության դատարանում շարունակում են ցուցմունք տալ Վանաձորում 2013թ.-ի հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի թիմակիցները: Հունվարի 26-ին տեղի ունեցած դատական նիստի ժամանակ ականատես-վկաներից երկուսը հայտարարել են, որ իրենք ոչինչ չեն տեսել, չգիտեն նաեւ, թե ով է կատարել սպանությունը:
«Վկաներից միայն մեկը բավականին հակասական, իրարամերժ տեղեկություններ հայտնեց դատարանին: Նրա տված ցուցմունքը շատ հարցեր առաջացրեց: Հետաքրքիր է, որ հենց այդ վկային երկու օրից ավելի պահել են ոստիկանությունում, իսկ թե ինչ պատճառով, նա չկարողացավ ասել»,- NEWS.am-ի թղթակցի հետ զրույցում ասաց գործով ամբաստանյալ Կարեն Կունգուրցեւի պաշտպան Արայիկ Պապիկյանը:
Փաստաբանի խոսքով՝ փետրվարի 2-ին շարունակվել է գործով մյուս վկաների ցուցմունքները:
Հիշեցնենք, որ ըստ մեղադրական եզրակացության՝ Կարեն Կունգուրցեւը հոկտեմբերի 12-ին ժամը 18:00-ի սահմաններում կենցաղային հողի վրա վիճաբանել է եւ ապօրինաբար կյանքից զրկելու` սպանելու դիտավորությամբ դանակով մեկ անգամ հարվածել է Դավիթ Հովակիմյանի կրծքավանդակի ձախ կեսի շրջանում`վերջինիս պատճառել մարմնական վնասվածքներ, սակայն վերջինիս ընկերների կողմից օգնության հասնելուց հետո Կարենը դիմել է փախուստի: Դեպքից անմիջապես հետո Դ. Հովակիմյանը տեղափոխվել է «Վանաձոր ԲԿ» ՓԲԸ, որտեղ ժամը 21:35-ին մահացել է: Կարենին մեղադրանք է առաջադրվել Քրեական օրենսգրքի 34-104-րդ հոդվածի 1-ին մասով: Խափանման միջոց է ընտրվել կալանավորումը: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: