ԼՂ հակամարտության կարգավորման բանակցային գործընթացում հաջողության երաշխիքը վստահության մթնոլորտի ստեղծումն է: Այս մասին, այսօր՝ հունվարի 27-ին, մամուլի ասուլիսում հայտարարել է ՀՀ պաշտպանության նախարար Սեյրան Օհանյանը:
Նրա խոսքով՝ առաջին հերթին դա նախատեսում է շփման գծից դիպուկահարների հեռացում, դիվերսիաներից ու սադրանքներից հրաժարում, միջադեպերի հետաքննության մեխանիզմների ստեղծում: Այս առթիվ նախարարն ընդգծել է, որ հայկական կողմը միշտ հանդես է եկել ուժի կիրառումից հրաժարվելու մոտեցման օգտին:
«Այդ առումով ԵԱՀԿ Միսնկի խումբը շատ անելիք ունի: Հենց միջադեպերի հետաքննությունների մեխանիզմների օգնությամբ կարելի է պարզել, թե կողմերից որ մեկն է խախտել հրադադարի ռեժիմը: Դա թույլ կտա հասցեական նշել խախտողին, ոչ թե երկու կողմերին ընդհանուր կոչեր անել»,-ասել է Սեյրան Օհանյանը:
Ինչ վերաբերում է ԵԱՀԿ Մինսկի խմբի ձեւաչափը փոխելու մասին խոսակցություններին, պաշտպանության նախարարը հիշեցրել է, որ ՀՀ իշխանությունները բազմիցս հայտարարել են համանախագահների գործունեությանը վստահելու մասին եւ ձեւաչափի փոփոխության անհրաժեշտություն չեն տեսնում:
Նախարարի խոսքով՝ համանախագահների գործողությունները քննադատում են, բայց նաեւ նրանց շնորհիվ արդեն երկար ժամանակ հաջողվում է խուսափել լայնամասշտաբ ռազմական գործողություններից: