Անկախ Հայաստանում ամենակայացած համակարգը բանակն է, որն ապահովում է երկրի ռազմական անվտանգությունը եւ կատարում իր առջեւ դրված խնդիրները։ Այս մասին այսօր՝ հունվարի 27-ին, լրագրողներին ասաց պաշտպանության նախկին փոխնախարար Վահան Շիրխանյանը։
«Հիշենք, որ Ադրբեջանն ավելի շատ զենք ուներ Արցախյան ազատամարտի ժամանակ, բայց հաղթեց հայ մարդու ոգին, հայրենասիրությունը, այն, որ հայը պատերազմում էր իր հողի, ազգի համար, իսկ ադրբեջանցին պայքարում էր իրեն չպատկանող հողերը հետ վերցնելու համար։ Այսօր ես հանգիստ եմ, որ մենք ունենք կայացած բանակ, որը կարող է ամուր պահել մեր դիրքերը»,-ասաց նա։
Վահան Շիրխանյանի խոսքով՝ մենք ամեն րոպե պետք է պատրաստ լինենք պատերազմի, քանի որ պատերազմը դեռ չի ավարտվել։
«Պատմությունը կրկնվում է, եւ մենք պետք է պատրաստ լինենք այդ կրկնությանը, պատերազմն անավարտ է։ Ադրբեջանցիները չեն կարող չանել այն, ինչ անում են, նրանք խնդիր ունեն կորցրածը հետ բերելու եւ երկրորդ ՝ արտաքին ճնշումը, առաջին հերթին՝ Թուրքիայի կողմից»,- ասաց Շիրխանյանը՝ նշելով, որ այդ կերպ Թուրքիան փորձում է Հայաստանին ճնշել։
Պաշտպանության նախկին փոխնախարարը վստահություն հայտնեց, որ պատերազմի վերսկսման դեպքում մենք կրկին հաղթելու ենք. «Մենք պատերազմում չենք օգտագործել մեր ամենակարեւոր զենքը՝ միասնական հայությունը, այ, որ դա օգտագործենք, արդեն կարող ենք շատ լուրջ հաջողությունների հասնել»։