Արխանգելսկում քրգործ է հարուցվել կնոջ նկատմամբ, որը փորձել է երիկամի դոնորի փախցնել իր երեխայի համար: Նրան օգնել են պայմանագրային երկու զինծառայողներ: Նրանք Գագարինի փողոցում բռնել են տղամարդուն եւ փորձել ուժով նստեցնել մեքենա՝ Մոսկվա տանելու համար:
Պարզվել է՝ կինը փորձում եր առեւանգել իր նախկին ամուսնուն, որը դարբին է աշխատում «Սեւմաշ» ՍՊԸ-ում: Դրա համար նա դիմել է ծանոթների օգնությանը: Ատրճանակով սպառնալով տղամարդուն՝ նրանք վերջինիս ստիպել են նստել Opel մեքենան:
Ոստիկաններին հաջողվել է օպերատիվ ձերբակալել բոլոր երեքին եւ ազատել տուժածին: Հարցաքննությանը բոլորը նույն բանն են ասել՝ դոնորական օրգանը հարկավոր էր ծանր հիվանդ երեխային: Փոխպատվաստումը նախատեսում էին անել Մոսկվայում: Երեխայի մայրը որոշել էր, որ լավագույն դոնորը հայրը կլինի:
«Քանի որ առեւանգմանը մասնակցում էին ներքին զորքերի զինծառայողներ, գործի հետաքննությունը կվարի զինվորական-քննչական վարչությունը: Երեք կասկածյալներին ստորագրությամբ բաց են թողել: Առեւանգվածը չի տուժել», – «Բալտինֆո»-ին պատմել է իրավապահների աղբյուրը:
Առեւանգող կնոջ մասին քիչ բան է հայտնի: Հաղորդվում է, որ նա ռուսական խոշոր բանկերից մեկում օպերատոր է: