Իրենց աշխատավարձային պարտքերը պահանջող նաիրիտցիները փետրվարին եւս մեկ ամսվա աշխատավարձ կստանան: Այս մասին այսօր՝ հունվարի 27-ին, նաիրիտցիներից մի քանիսի հետ հանդիպմանն ասել է Էներգետիկայի եւ բնական պաշարների նախարար Երվանդ Զախարյանը՝ տեղեկացնելով, որ փետրվարի 2-ին գործարանում կհանդիպի նաիրիտցիներին եւ աշխատավարձը տալու օրվա վերաբերյալ հստակ տեղեկատվություն կտրամադրի:
«6 հոգով ենք մտել նախարարի մոտ, վեցս էլ խոսել ենք, ասել ենք ամեն ինչ, նույնիսկ այն, որ իրեն չենք հավատում: Նախարարը դրան պատասխանեց՝ կհավատաք, թե ոչ, դա ձեր պրոբլեմն է, ես գիտեմ՝ ինչ եմ անում, եւ անում եմ»,- նախարարության առջեւ հավաքված նաիրիտցիներին պատմեց հանդիպմանը մասնակցած՝ գործարանի մամուլի քարտուղար Անուշ Հարությունյանը:
Անուշ Հարությունյանը տեղեկացրեց, որ նախարարի հետ քննարկման ժամանակ եւս մեկ անգամ հաստատվել է, որ աշխատավարձերը կմարվեն գործարանի գույքի վաճառքից ստացված գումարից: Նա նշեց նաեւ, որ նախարարն ասել է՝ փետրվարին, հնարավոր է, մի քանի ամսվա աշխատավարձ տրվի, եթե գործարանի գույքի վաճառքն արագ ընթանա:
Նաիրիտցիները բողոքի ակցիաներ չեն անի մինչեւ փետրվարի 2-ի հանդիպումը:
Հիշեցնենք, որ հարկադիր պարապուրդի մատնված՝ «Նաիրիտ» գործարանի աշխատակիցների՝ 18 ամսվա աշխատավարձերի պարտքը կազմում է մոտ 15 մլն դոլար: Նրանք բազմիցս հավաքվել են Կառավարության եւ նախագահականի մոտ՝ պահանջելով իրենց խնդիրների լուծում:
Օրերս էներգետիկայի եւ բնական պաշարների նախարար Երվանդ Զախարյանը ընդունել է «Նաիրիտ» գործարանի աշխատանքային հանձնաժողովի 5 անդամներին եւ խոստացել առաջիկա երեք ամիսների ընթացքում բավարարել նաիրիտցիների պահանջը։
