«Արթիկ» ՔԿՀ կալանավորին 4 հեռախոսի լիցքավորիչի մեջ կասկածելի զանգվածներով փաթեթ տարած փաստաբան Ռուբեն Մովսիսյանի նկատմամբ խափանման միջոց կալանք ընտրելու վերաբերյալ Վճռաբեկ դատարան բողոք է ներկայացվել:: Այս մասին NEWS.am-ի թղթակցի հետ զրույցում ասաց փաստաբան Թամարա Յայլոյանը:
Նա նշեց, որ առայժմ պատասխան չեն ստացել՝ այն վարույթ ընդունվել է, թե ոչ: Ռուբեն Մովսիսյանը շարունակում է մնալ կալանքի տակ, սպասում են քննչական գորոծղություններ անելուն՝ առերեսումներ, հարցաքննություններ: Փաստաբանից հետաքրքրվեցինք, թե ինչ կապ ուներ իր պաշտպանյալը կալանավորի հետ, ում այցելել էր, նա նշեց, որ նախկինում պաշտպանել է նրա շահերը, այլ մանրամասներ չհաղորդեց՝ ելնելով նախաքննության գաղտնիությունից: Իսկ թե որտեղ եւ երբ է հայտնաբերվել թմրանյութը, Թամարա Յայլոյանը նշեց, որ այն հայտնաբերվել է հենց անցակետում, բայց փաստաբանը հայտարարել է, որ ինքը չի իմացել, որ թմրանյութ է տանում:
Հիշեցնենք, որ Շիրակի մարզային քննչական վարչության Արթիկի քննչական բաժնում ստացվել են նյութեր` փաստաբանի պայուսակի մեջ գտնվող բջջային հեռախոսների լիցքավորիչների մեջ հայտնաբերված կասկածելի զանգվածների վերաբերյալ: Այս մասին NEWS.am-ը տեղեկացել է Քննչական կոմիտեից:
Ստացված նյութերի համաձայն` 2014 թվականի դեկտեմբերի 23-ին` ժամը 17:45-ին, «Արթիկ» ՔԿՀ-ում աշխատակիցների կողմից զննության է ենթարկվել նույն քրեակատարողական հիմնարկի կալանավոր Ա.Պողոսյանին տեսակցության գնացած փաստաբանի ձեռքի պայուսակը, որի մեջ առկա 4 հատ բջջային հեռախոսի լիցքավորիչների զննությամբ երեքի միջից հայտնաբերվել են կասկածելի զանգվածներով փաթեթներ: Նույն օրը` ժամը 21-ի սահմաններում, նույն քրեակատարողական հիմնարկի աշխատակիցների կողմից վարչական մասնաշենքի կանանց զուգարանից հայտնաբերվել է բջջային հեռախոսի ևս մեկ լիցքավորիչ, որի զննությամբ նույնպես հայտնաբերվել է կասկածելի զանգվածներով 3 հատ փաթեթ: Փաստի առթիվ Արթիկի քննչական բաժնում նախապատրաստվում են նյութեր: Բացատրություն է տվել փաստաբանը, ով հայտարարել է, որ լիցքավորիչներն իրեն տվել է անծանոթ մի տղամարդ` կալանավորին փոխանցելու համար:
Նշանակվել են դատաքիմիական փորձաքննություններ` կասկածելի զանգվածների բաղադրությունը պարզելու համար: Միջոցներ են ձեռնարկվում՝ դեպքի բոլոր հանգամանքները պարզելու, օբյեկտիվ, բազմակողմանի և լրիվ հետազոտելու համար: Վերաքննիչ դատարանը վերացրել է առաջին ատյանի դատարանի որոշումը՝ փաստաբանին գրավով ազատելու մասին եւ հենց Վերաքննիչ դատարանից նրան վերցրել են կալանքի տակ: