Մոսկվայում ոստիկանները փնտրում են սադիստին, որը հենց փողոցում հաշմանդամ է դարձրել կնոջը: Անտարբեր անցորդների աչքի առջեւ չարագործը գետնին է տապալել տուժողին, հետո սկսել է կոտրել նրա ոտքերն ու կողերը: Հաշվեհարդարն ավարտելուց հետո, սադիստը ածելիով կտրատել է կնոջ դեմքը:
հարձակումը ֆիքսել է այդ վայրում տեղադրված տեսախցիկը: Հանցագործությունը կատարվել է հունվարի 24-ի երեկոյան Բալշայա Տուլսկայա փողոցում: Ներկայումս 34-ամյա տուժածը՝ Օքսանան, գտնվում է վերակենդանացման բաժանմունքում:
Կադրերից դատելով, չարագործը կնոջը մոտեցել է հետեւից եւ ուժեղ հարվածով նրան գետնին տապալել: Հետո տղամարդը սկսել է շրջահայացորեն կոտրել կնոջ ոտքերը: Նա ուղղել է տուժածի ոտքերը, ապա ամբողջ իր մարմնով ցատկել վրան, այնուհետեւ հանել է ածելին ու կտրատել կնոջ դեմքը:
Գազանային հաշվեհարդարի ականատես են եղել պատահական անցորդներ: Մի երիտասարդ չափից ավելի մոտեցել է չարագործին, նայել տեղի ունեցողին, բայց չի միջամտել, անգամ ոստիկանություն չի զանգահարել, գրում է Life News-ը:
Հիվանդանոցում բժիշկները Օքսանայի մոտ արձանագրել են ձախ զիգոմատիկ ոսկորի կոտրվածք, կտրած վնասվածքներ ու կապտուկներ դեմքին, ծնոտի վերին մասի կոտրվածք եւ փակ գանգուղեղային վնասվածք: LifeNews-ի փոխանցմամբ, կոտրված են նաեւ կնոջ երկու ոտքերը:
