«Իսլամական պետություն» խմբավորման գրոհայինները սպառնում են մահապատժի ենթարկել Հորդանանի ՌՕՈՒ օդաչու Մոազ ալ Քասաբեհին (Moaz al-Kassasbeh), եթե ահաբեկչուհի Սաջիդա ալ Ռիշավին մինչեւ հունվարի 29-ի երեկոն ազատ չարձակվի, գրում է CNN-ը։
Ցանցում ձայնային հաղորդագրություն է հայտնվել, որում եւս մեկ պատանդ՝ ճապոնացի Կենձի Գոտոն (Kenji Goto) հնչեցնում է վերջնագիրը՝ հունվարի 29-ին մայրամուտից առաջ կնոջը բերել թուրքական սահմանի մոտ։ Հորդանանի ԱԳ նախարար Նասեր Ջուդեհը (Nasser Judeh) հունվարի 28-ին հայտարարել էր, որ կալանավորին կփոխանակեն օդաչուի հետ։
Մեկ շաբաթ առաջ գրոհայինները տեսագրություն էին տարածել՝ ճապոնացի երկու պատանդներին եւ Հորդանանի ՌՕՈՒ օդաչուին ազատելու համար 200 մլն դոլար փոխանցելու պահանջով։ 72 ժամ անց նրանք տեղեկություն էին տարածել ճապոնացի Հարունա Յուկավայի մահապատիժն իրագործելու մասին։
Այժմ գրոհայիններն առաջարկում են ալ Ռիշավիի հետ փոխանակել մնացած երկու պատանդներին: Վերջնագրի ժամկետը 24 ժամ է, եւ հաջորդ զոհ է նշվել օդաչու ալ Քասաբեհը, հայտնում է Lenta.ru-ն:
Սաջիդա ալ Ռիշավին Հորդանանի բանտի մահապարտների խցում է: Նա դատապարտված է մահապատժի՝ 2005 թ. Ամանում ահաբեկչական կոչերի համար:
Մոազ ալ Քասաբեհը պատանդ է վերցվել 2014 թ. դեկտեմբերին: Նա կործանիչի օդաչու է, որը վթարի էր ենթարկվել Սիրիայի տարածքում: Հորդանանի իշխանությոնները կասկածում են, որ նա ընդհանրապես ողջ է: Երկրի ԱԳՆ-ն պահանջել է ապացույց ներկայացնել, սակայն ոչ մի ապացույց չի ստացել: