Հայաստանի կենտրոնական բանկը արմատական հարցերի է անցնում՝ չլուծելով ամենապարզ հարցերը: Այս մասին, այսօր՝ լրագրողների հետ հանդիպման ժամանակ նշել է Մարդկային կայուն զարգացման միջազգային կենտրոնի փորձագետ, տնտեսագետ Աշոտ Խուրշուդյանը:
Նրա խոսքով՝ ներկայումս վարվող բանկերի խոշորացման արժութային շուկայի կարգավորման քաղաքականությունն ուղղված է ավանդների ու վարկերի դոլարիզացիայի կրճատմանը:
Խուրշուդյանը նշել է, որ ԿԲ ուղերձը կարելի է հասկանալ այսպես. Եթե բոլորը բանկերում դրամ պահեն, իրավիճակն ավելի կառավարելի կլինի: «Բայց հիմա հիմա նույնիսկ կառավարելի արժութային շուկա չունենք, էլ չասած բանկային պորտֆելների մասին»,-հավելել է տնտեսագետը:
Պատճառներից մեկն, ըստ նրա, այն է, որ բանկերը չեն տեսնում, թե որտեղ կարող են ներդնել իրենց ակտիվները, բացի անշարժ գույքից: «Իսկ եթե ամենահարմարը դառնում է անշարժ գույքի մեջ փողեր ներդնելը, դա արդեն ոչ թե տնտեսություն է, այլ լճացած ինչ-որ բան»,-հայտարարել է Խուրշուդյանը: