Տավուշի մարզում այսօր՝ հունվարի 29-ին, հակառակորդի դիվերսիոն գործողությունների հետեւանքով երկու զինծառայող է վիրավորվել: NEWS.am-ի այս տեղեկությունը հաստատեց պաշտպանության նախարարի մամուլի խոսնակ Արծրուն Հովհաննիսյանը:
«Իջեւան» բժշկական կենտրոնից էլ մեզ հայտնեցին, որ զինծառայողներից Գրիշա Օթարյանը հրազենային վնասվածքներ է ունեցել ձախ ազդրին, քերծվածքներ՝ կրծքավանդակին, իսկ Սուրիկ Մովսիսյանը՝ աջ նախաբազկի հրազենային վերք է ունեցել:
«Լուրջ բան չի եղել, զինծառայողներն արդեն դուրս են գրվել հիվանդանոցից»,-հայտնեցին հիվանդանոցից:
Մեր տեղեկություններով՝ Գրիշան Սպիտակի բնակիչ է, իսկ Սուրիկը՝ Տավուշի մարզի Խաշթառաք գյուղի:
Ավելի վաղ պաշտպանության նախարարության մամուլի ծառայությունը հայտնել էր, որ հունվարի 29-ին, ժամը 00:30-ի սահմաններում հակառակորդը հերթական դիվերսիոն գործողությունների փորձն է ձեռնարկել ՀՀ Տավուշի մարզում: Ոսկեպար-Կիրանց հատվածում ադրբեջանական դիվերսիոն խումբը կրակահերթեր է արձակել Daewoo մակնիշի քաղաքացիական մեքենայի ուղղությամբ: Մեքենայում գտնվող 3 անձինք հակառակորդի կրակահերթերից չեն տուժել:
Հայկական կողմի ձեռնարկած գործողությունների արդյունքում հետախուզական-դիվերսիոն խմբի անդամները հետ են շպրտվել:
