Դերասան Վարդան Պետրոսյանը մեղավոր ճանաչվեց նրա դեմ առաջադրված մեղադրանքում եւ ենթարկվեց 5 տարի ժամկետով ազատազրկման՝ 2 տարով զրկվելով մեքենա վարելու իրավունքից՝ նրա դեմ կիրառված խափանման միջոց կալանքը թողնելով անփոփոխ։ (ֆոտոռեպորտաժ)
Կոտայքի մարզի ընդհանուր իրավասության դատարանի դատավոր Վաղինակ Մկրտչյանը այսօր՝ հունվարի 29-ին, կարդաց դատավճիռը, ըստ որի դերասանը մեղավոր է ճանաչվում ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։
Հիշեցնենք, որ դատախազը 6 տարի 6 ամիս ժամկետով ազատազրկում էր պահանջել։ Վարդան Պետրոսյանն իր վերջին խոսքում ասել էր, որ իրեն առաջադրված մեղադրանքում իրեն մեղավոր չի ճանաչում։
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ:
Լուսանկարները՝ Արսեն Սարգսյանի /NEWS.am