Մեր գները, ասենք, ռուսականի հետ համեմատելու համար ներկայում հետաքրքիր խնդիր է առաջացել: Հայաստանում ռուսական ռուբլու նկատմամբ դրամի փոխարժեքը նկատելիորեն ամրապնդվել է (մեկ տարվա ընթացքում՝ 1.7 անգամ), իսկ դոլարի նկատմամբ՝ թուլացել (16%-ով): Սակայն Ռուսաստանում ռուբլին դոլարի նկատմամբ հսկայական անկում է արձանագրել՝ 1.9 անգամ:
Այդ պատճառով արժույթի փոխարժեքի գործոնը կարող է հանգեցնել գների իրական հարաբերակցության խեղման: Կարելի է այլ մեթոդ օգտագործել. հաշվարկել, թե որքան կարեւորագույն սննդամթերք կարելի է գնել նվազագույն աշխատավարձով: Այստեղ նույնպես խնդիր կա: Գաղտնիք չէ, որ մեր «ստվերային զբաղվածությունում», որտեղ առանձնապես բարձր որակավորում անհրաժեշտ չէ, աշխատավարձը նկատելիորեն քիչ է սահմանված նվազագույնից:
Չանտեսենք նաեւ այն գործոնը, որ Ռուսաստանում միջին աշխատավարձը մի քանի անգամ ավելին է այդ ոլորտում մեր «ձեռքբերումներից»: Սակայն համեմատությունը կատարենք՝ որպես հիմք ընդունելով նվազագույն աշխատավարձի եւ գների մասին պաշտոնական տվյալները: Հաշվի առնենք մի քանի պայման: Ասենք՝ հացի «կիլոգրամը» Ռուսաստանում ավելի մոտ է այդ քաշին, քան Հայաստանում:
Համեմատության համար վերցնենք ռուսական Կրասնոդար քաղաքը (տես՝ աղյուսակը), որը բնակչության թվով համադրելի է Երեւանի հետ: Այդ քաղաքում, որն աշխարհագրորեն մոտ է մեր երկրին, մեր բազմաթիվ հայրենակիցներ են ապրում: Որոշ տվյալների համաձայն, Կրասնոդարի երկրամասում, ընդհանուր առմամբ, շուրջ 650-700 հազար հայ կա:
Ռուսաստանում նվազագույն աշխատավարձը մեկ տարվա ընթացքում ավելացել է 7.4%-ով: Դա զգալիորեն զիջում է գնաճի տեմպերին, որը տարեկան կտրվածքով կազմել է 13%: Հաշվի առնենք նաեւ, որ արդյունաբերական գնաճն այս երկրում առանձնացել է առավել կտրուկ աճով:
Այսպես, Կրասնոդարում սերուցքային կարագի մանրածախ գինը տարեկան կտրվածքով միջինում աճել է շուրջ 1.3 անգամ (հունվարի 26-ի դրությամբ), տավարի մսինը՝ 1.2 անգամ, խոզինը՝ 1.3 անգամ, շաքարավազինը՝ 1.8 անգամ, սառեցված ձկան գինը՝ 1.5 անգամ: Ռուսաստանցիների այդքան սիրելի հնդկաձավարը թանկացել է 1.8 անգամ, ավելի քիչ տարածված բրինձը՝ 1.4 անգամ եւ այլն:
Ներկայում մեր հյուսիսային հարեւանի մոտ իրավիճակն այնպիսին է, որ գներն ավելանում են ոչ թե օրեցօր, այլ ժամ առ ժամ: Բանը հասել է նրան, որ մարզային դատախազությունները վերջերս ստուգումներ են անցկացրել ցանցային խանութներում՝ սպեկուլյացիայի դեպքեր հայտնաբերելու համար: Սակայն անցյալի փորձը ցույց է տալիս, որ միայն վարչական միջոցառումներով գների աճը կանգնեցնելն անհնար է:
