Աֆղանստանի արեւելքում գտնվող Մեհթարլամ քաղաքու թաղման արարողության ժամանակ պայթյունի հետեւանքով 16 մարդ է զոհվել, եւս 39-ը՝ տարբեր աստիճանի վնասվածքներ են ստացել։ Ավելի վաղ հաղորդվում էր 5 զոհերի մասին։
Լահման նահանգի ղեկավարի մամուլի քարտուղարը հայտնել է, որ զոհերի թվում են ոստիկանության քննչական բաժնի ղեկավարը, ինչպես նաեւ 3 սպաներ։ Իրավապահ մարմինների եւս 3 ներկայացուցիչներ վիրավորվել են, հայտնում է «ՌԻԱ Նովոստին»։
Պայթյունը որոտացել է տեղի ոստիկանության աշխատակցի թաղման ժամանակ: Մահապարտ ահաբեկիչը մտել է բազմության մեջ, ապա գործի դրել պայթուցիկ սարքը: Ներկա պահին ոչ ոք չի վերցրել իր վրա ահաբեկչության պատասխանատվությունը, սակայն իշխանությունների ներկայացուցիչները պնդում են, որ պայթյունի հետեւում կանգնած է «Թալիբան» շարժումը։