Բուլղարիայի իշխանությունները Սաիդ եւ Շերիֆ Քուաշի եղբայրների կողմից Charlie Hebdo-ի խմբագրության վրա ահաբեկչական հարձակում իրականացնելու գործով կասկածյալ Ֆրից-Ժոլի Ժոակինին արտահանձնել են Ֆրանսիային ։

Ժոակինը Բուլղարիայի իրավապահ մարմինների կողմից ձերբակալվել էր հունվարի 1-ին՝ թուրքական սահմանը հատելիս։ Ենթադրվում է, որ նա Թուրքիայից ծրագրել է հասնել Սիրիա։

Արտաքսվողը ժխտում է ահաբեկչական գործունեությանն իր ներգրավվածությունը։ Նրա խոսքով՝ նա ծանոթ է եղել Քուաշի եղբայրներից մեկի հետ, սակայն տեղյակ չի եղել լրագրողների վրա հարձակման նրանց ծրագրերին, հաղորդում է «Ռոսբալտը»։

Ակնկալվում է, որ Ժոակինը այսօր արդեն կհարցաքննվի Փարիզի ահաբեկչության հարցերով դատական քննիչի կողմից։

Հիշեցնենք, որ հունվարի 7-ին «Charlie Hebdo» երգիծական շաբաթաթերթի խմբագրության վրա ահաբեկչական գրոհի արդյունքում Փարիզում զոհվել էր 12 մարդ: Ահաբեկչության հեղինակները՝ Քուաշի եղբայրները, ոչնչացվել են։