Թուրքիայից, Ճապոնիայից եւ այլ երկրներից տասնյակ լրագրողներ թուրք-սիրիական սահմանային Աքչաքալե անցակետում սպասում են ճապոնացի լրագրող Կենձի Գոտոյի եւ հորդանանցի օդաչու Մուազ ալ-Քասասբեհի ազատ արձակմանը, որոնք «Իսլամական պետություն» (ԻՊ) խմբավորման զինյալները պատրաստվում են փոխանակել հորդանանյան բանտում գտնվող կին մահապարտ-ահաբեկչի հետ:
Թուրքական լրատվամիջոցների փոխանցմամբ, Հորդանանը պատրաստ է Սաջիդա ար-Ռիշաուիին փոխանակել իր օդաչուի հետ: Լրագրողները շարունակում են հերթապահել հսկիչ-անցագրային կետի մոտ, չնայած որեւէ պաշտոնական հայտարարություն չի արվել այն մասին, որ ազատ արձակվելու դեպքում գերիներին Թուրքիա կփոխանցեն հենց Աքչաքալեից: ՌԻԱ Նովոստիի տեղեկացմամբ, լրագրողներն ընտրել են հենց այս անցակետը, քանի որ այն նախկինում էլ օգտագործվել է նման փոխանակումների համար:
Ավելի վաղ համացանցում աուդիոձայնագրություն էր հայտնվել, որտեղ ԻՊ-ի կողմից գերեվարված Գոտոյի անունից ձայնը հայտարարում է ահաբեկիչների պահանջը՝ հորդանանյան բանտում գտնվող մահապարտ-ահաբեկիչ Սաջիդա ար-Ռիշաուիին հանձնելու մասին՝ մինչեւ արեւի մայր մտնելը թուրք-սիրիական սահմանին գերիների հետ փոխանակելու համար: Եթե այդ պահանջը չկատարվի, ապա, ըստ ուղերձի, «հորդանանցի օդաչուն անմիջապես կսպանվի»: