Իսրայելի նախագահը չի բնորոշել Խոջալուի իրադարձությունները որպես ցեղասպանություն: Այդ մասին ասել է Հայաստանում հրեական համայնքի ղեկավար Ռիմա Վարժապետյանը (Ֆելլեր)՝ պատասխանելով դիտարկմանը, թե Իսրայելի նախագահ Ռեուվեն Ռիվլինը ՄԱԿ ԳԱ-ում Հոլոքոստի հիշատակի միջազգային օրվան նվիրված ելույթի ժամանակ, խոսելով ցեղասպանությունների մասին, անդրադարձել է Խոջալուի իրադարձություններին:
«Նախ թույլ տվեք ընդգծեմ, որ Իսրայելի նախագահը չի բնորոշում Խոջալուի իրադարձությունները որպես ցեղասպանություն: Նա խոսում է իրականացված սպանությունների մասին, ինչն անհերքելի իրողություն է, չնշելով, թե ում կողմից են իրականացվել այդ սպանությունները: Հայտնի է, որ 1992թ. Արցախյան ուժերի կողմից թողնվել էր մարդասիրական միջանցք, որով եւ Խոջալուի բնակչությունը հասավ ադրբեջանական զինուժի վերահսկողության ներքո գտնվող Աղդամի մատույցներ, որտեղ նրանք ենթարկվեցին մասսայական սպանդի, ինչը Ադրբեջանի այն ժամանակվա քաղաքական ուժերի ներքին խաղերի արդյունք էր»,- ասել է Ռիմա Վարժապետյանը:
Ըստ նրա, հայտնի է նաեւ, որ ներկայիս Ադրբեջանի իշխանությունները ամեն կերպ փորձում են ներկայացնել այս իրադարձությունները որպես Արցախյան ուժերի կողմից իրականացված գործողություն քարոզչական հարթակում դիվիդենտներ շահելու նպատակով: «Չեմ բացառում, որ Ադրբեջանի հետ Իսրայելի ունեցած ներկա հարաբերությունները, ինչպես նաեւ ադրբեջանական քարոզչությունը իրենց դերը խաղացել են այն հարցում, որ Իսրայելի նախագահը իր ելույթում հղում է կատարում Խոջալուին՝ չմանրամասնելով ողջ պատկերը: Սակայն եթե ուշադիր նայեք նախագահ Ռիվլինի ողջ ելույթը, կտեսնեք որ նա խոսում է ոչ միայն ցեղասպանությունների, այլ նաեւ քաղաքական նկատառումներով ժողովուրդների կամ մարդկանց խմբերի դեմ իրականացվող բռնության բոլոր երեւույթների դատապարտման մասին»,- ասել է հրեական համայնքի ղեկավարը:
Վերջինս կարծում է, թե Իսրայելի նախագահի ելույթում Հայաստանի քաղաքացիների եւ աշխարհասփյուռ հայության համար առանցքային հատվածը 1915թ. Օսմանյան կայսրությունում հայերի նկատմամբ իրականացված կոտորածների մասին անդրադարձն է: «Նախագահը ոչ միայն այդ իրադարձությունների մասին խոսում է որպես ցեղասպանության, այլ նաեւ ընդդծում է այդ իրադարձությունների նկատմամբ անտարբեր վերաբերմունքի եւ հետագայում աշխարհի տարբեր հատվածներում տեղի ունեցած ողբերգությունների միջեւ կապի մասին: Նախագահ Ռիվլինը խոսում է նաեւ 100-ամյա ժխտողականության մասին՝ ընդգծելով, որ Իսրայել երկրում ոչ մեկը չի կարող ժխտել տեղի ունեցածը: Սա աննախադեպ առաջընթաց է Իսրայելի կողմից Հայոց ցեղասպանության փաստի անվերապահ ճանաչման ճանապարհին, ինչը վստահ եմ տեղի է ունենալու վաղ թե ուշ»,- ասել է նա: