Հայաստանում իշխանափոխության պահանջը մշտապես եղել է խորհրդարանական եռյակի օրակարգում: Այս մասին հունվարի 30-ին խորհրդարանական եռյակի նիստի ավարտին հայտարարել է «Ժառանգություն» կուսակցության ղեկավար Ռուբեն Հակոբյանը:
Ըստ պատգամավորի՝ օրակարգում շարունակում է մնալ կառավարման ճգնաժամի հարցը, եւ հաջորդ շաբաթ կայանալիք խորհրդարանի նիստի ընթացքում, որպես արտահերթ հարց, երեք քաղաքական ուժերի կողմից բարձրացվելու է ճգնաժամի վերաբերյալ հարցը:
Ինչ վերաբերում է նրան՝ սպասվում է արդյոք թեժ քաղաքական գարուն, ապա, ինչպես ասել է ընդդիմադիրը, ինքը չգիտի՝ ով է ներմուծել «թեժ գարուն» եզրը, սակայն միանշանակ գիտի, որ «պետք է քայլեր ձեռնարկվեն՝ երկրում ստեղծված իրավիճակից դուրս գալու համար»:
Ռուբեն Հակոբյանը նաեւ նշել է, որ զանգվածային ցույցեր անցկացնելու հարցը քննարկվելու է խորհրդարանական եռյակի նախաձեռնությամբ կայանալիք խորհրդարանի արտահերթ նիստում: «Եթե խորհրդարանի արտահերթ նիստը չկայանա կամ էլ կայանա՝ առանց ցանկալի արդյունքի, ապա քննարկվելու է զանգվածային ցույցեր անցկացնելու հարցը»: