Մենք մշտապես թերահավատորեն ենք վերաբերում պատմությունը խմբագրելու փորձերին, եւ կարծում ենք, որ այդ փորձերը ոչ միայն դատարկ են, այլեւ վտանգավոր։ Այդ մասին այսօր՝ հունվարի 30-ին, Հայոց ցեղասպանության թանգարան-ինստիտուտում հայտարարեց ՀՀ նախագահի վարչակազմի ղեկավար, Հայոց ցեղասպանության 100-ամյա տարելիցին նվիրված միջոցառումների համակարգող Վիգեն Սարգսյանը՝ անդրադառնալով ապրիլի 24-ը որպես Գալիպոլիի ճակատամարտի հաղթանակի օր նշելու Թուրքիայի նախագահ Ռեջեփ Թաիփ Էրդողանի մտադրությանը։
Նրա խոսքով՝ Հայաստանի նախագահը հստակ գնահատական է տվել սեփական պատմությունը խմբագրելու Թուրքիայի իշխանությունների որոշմանը՝ ելնելով քաղաքական նպատակներից։ «Մենք մեր բոլոր գործընկերներին կհուշենք, որ ոչ նպատակահարմար ենք համարում Հայոց ցեղասպանության զոհերի հիշատակի օրը տոնական միջոցառումների անցկացումը։ Սակայն եթե որոշ երկրների ներկայացուցիչներ, իրենց շահերից ելնելով, այդ օրը մեկնեն Թուրքիա, մենք մեր միջոցառումները չպետք է կապենք դրա հետ», - ասել է Վիգեն Սարգսյանը»։
«Եթե որեւէ մեկը կանգնած է մեր կողքին, մենք դա գնահատում ենք, եթե գերադասում է որեւէ այլ վայրում գտնվել, մենք համապատասխան եզրահանգումներ ենք կատարում», - եզրափակել է Վիգեն Սարգսյանը։