Ադրբեջանի հերթական դիվերսիայի ժամանակ վիրավորված հայ զինծառայող Հովհաննես Ավանեսյանին նորից վիրահատել են: Այս մասին NEWS.am-ի թղթակցի հետ զրույցում ասաց Կենտրոնական կայազորի զինվորական հոսպիտալի տնօրեն Արամ Ասատուրյանը:
Նա նշեց, որ ստիպված են եղել անել վիրահատության, քանի որ այդքան օր զինծառայողին անշարժ պահելը կարող էր նոր խնդիրների առաջ կանգնեցնել: «Վիճակը դեռ չի կայունացել, բայց մենք ողնաշարի վիրահատություն արեցինք, ֆիքսցեինք ողնաշարը, բարեբախատաբար, վիրահատությունը բարեհաջող է անցել, առաջիկա օրերին նրան արդեն կնստացնենք»,-ասաց Արամ Ասատուրյանը:
Նա նշեց, որ այժմ զինծառայողի վիճակը կայուն է, մնում է, որ լյարդը հանգիստ լինի եւ նոր խնդիրներ չառաջացնի: Արամ Ասատուրյանը նշեց, որ ի սկզբանե զինծառայողի ողնուղեղը վնասված է եղել, 99 տոկոսով քայլելու հնարավորություն չի ունենա, բայց հրաշքներ լինում են եւ ինտենսիվ ռեաբիլիտացիայի շնորհիվ հնարավոր է ինչ-որ առումով վերականգնել քայլելը:
Ավելի վաղ պաշտպանության նախարարի մամուլի խոսնակ Արծրուն Հովհաննիսյանն իր ֆեյսբուքյան էջում գրել էր. «Գիշերվա ընթացքում խախտումների ընդհանուր թիվը անցնում է 300-ը: Հունվարի 23-ին առավոտյան ժամը 9:00-ի սահմաններում ադրբեջանական բանակի հատուկ նշանակության ստորաբաժանումները հարձակում են իրականացրել նաեւ Տավուշի մարզի Բերդի տարածաշրջանի մարտական դիրքերից մի քանիսի ուղղությամբ:
Հայկական բանակի համապատասխան ստորաբաժանումների կողմից ժամանակին հայտնաբերվելով մարտ է սկսվել, որը տեւել է շուրջ կես ժամ: Հակառակորդը կորուստներ կրելով եւ մարտական խնդիրը չկատարելով հետ է շպրտվել, սակայն ցավոք հայկական կողմը ունի երկու զոհ եւ վիրավորներ: Զոհվել են լեյտենանտ Կարեն Արարատի Գալստյանը եւ շարքային Արտակ Վաղարշակի Սարգսյանը»:
Հիշեցնենք, որ հայ զինծառայող Հովհաննես Ավանեսյանին Բերդի հիվանդանոցից տեղափոխել են Կենտրոնական կայազորի զինվորական հոսպիտալ: