Փոքր եւ միջին ձեռնարկատերերի համար հարկը հարկավոր է փոխարինել հաստատագրված վճարով։ Այս մասին հունվարի 31-ին հայտարարել է Հայրենական ապրանքարտադրողների միության նախագահ Վազգեն Սաֆարյանը։
Ըստ նրա՝ սա կպարզեցնի հաշվապահական հաշվառումը, որը փոքր բիզնեսի չափորոշիչներով բավական ծախսատար է։ Կարեւորը՝ այն կազատի նրանց գործարքների ապրանքաշրջանառության բարրդություններից, որից այդքան բողոքում են առեւտրականները։
Եթե ֆիննախը չի ցանկանում բյուջեի մուտքեր կորցնել, ապա կարող է հիմք ընդունել ՓՄՁ-ների ներկայիս գանձումները (տարեկան 20-22 մլրդ դրամ), եւ բաշխել դրանք գործող առեւտրային տաղավարների քառակուսի մետրի հաշվարկով։ Այսինքն՝ հարկը եթե ցածր չլինի, գոնե ավելի պարզ կլինի։ «Յուրաքանչյուրը կվճարի ըստ մակերեսի եւ կմոռանա փաստաթղթաշրջանառության եւ հարկային ստուգումների մասին։ Ահա թե ինչ ենք առաջարկում», - նշել է Սաֆարյանը։
Նշենք, երեկ կառավարության շոնքի մոտ առեւտրականները բողոքում էին շրջանառության հարկի մասին նոր օրենքից, որն ուժի մեջ է մտել հոկտեմբերի 1-ից։ Ըստ օրենքի՝ հարկային դրույքը 3,5-ից իջեցվել է 1%-ի, բայց հաշիվ-ապրանքագրերի հանդեպ պահանջները խստացվել են։ Ըստ առեւտրականների՝ բարդությունն այն է, որ խոշոր մատակարարները հաճախ հրաժարվում են դրանք տրամադրելուց։