Կոլորադո ամերկյան նահանգի սենատը քվեարկություն չի անցկացրել բանաձեւի վիճելի նախագծի համար, որտեղ բարձր է գնահատվում «Ամերիկայի Միացյալ Նահանգների եւ Ադրբեջանի Հանրապետության միջեւ ռազմավարական համագործակցությունը»: Սնեատի նիստին ներկա է գտնվել Ադրբեջանի գլխավոր հյուպատոս Նասիմ Աղաեւը: Այդ մասին գրում է «Asbarez»-ը՝ վկայակոչելով ԱՄՆ-ի արեւմտյան շրջանի Հայ դատի ամերիկյան գրասենյակին:
Բանաձեւի նախագծի համահեղինակ Լարի Քրաուդերը համաձայնել է հետ կանչել այդ փաստաթուղթը՝ այն հանելով օրակարգից:Բանաձեւի նախագծի շուրջ քվեարկությունը տեղափոխվել է 2015թ. մայիսի 15-ին:
Նախքան փաստաթղթի հետ կանչելը՝ Քրաուդերը ելույթ է ունեցել Ադրբեջանի գլխավոր հյուպատոսի ներկայությամբ՝ հարգանք հայտնելով Ադրբեջանի ռեժիմի նկատմամբ, որը լայնորեն քննադատվում է մարդու իրավունքների խախտումների համար: «Աղաեւը, անկասկած, ակնկալում էր վերադառնալ Լոս-Անջելեսի իր գրասենյակ՝ մեծամտանալով օրենսդրական հաղթանակով: Սակայն նման հնարավորություն վերջինիս անգամ չի ընձեռնվել», - նշվում է հոդվածում:
Արեւմտյան շրջանում Հայ դատի գրասենյակի գլխավոր տնօրեն Էլեն Ասատրյանը նշել է. «Մենք ուրախ ենք, որ Կոլորադո նահանգը միանում է Միսիսիպիին, Թեննեսիին, Վայոմինգին՝ հաստատելով, որ նա նույնպես չի վաճառվում նախագահ Իլհամ Ալիեւի՝ նավթով հարուստ եւ կառուպացված ռեժիմին»:
Քվեարկությունից մի քանի օր առաջ Հայ դատի գրասենյակն աշխատել է տեղի համայնքների եւ ակտիվիստների առաջնորդների հետ՝ Ադրբեջանի նախագահ Իլհամ Ալիեւի ավտորիտար եւ կոռումպացված ռեժիմի մասին օրենսդիրներին նախազգուշացնելու նպատակով, որը վերջին ժամանակներս ավելի լայնորեն է լուսաբանվում մամուլում, օրինակ «The Wall Street Journal»-ում եւ «The New York Times»-ում:
