Հայաստանը պետք է պահպաներ խորհրդային արդյունաբերությունը եւ չընկներ փոքր ու միջին ձեռնարկությունների հարկերի հետեւից: Այս մասին այսօր՝ հունվարի 31-ին, լրագրողների հետ հանդիպման ժամանակ նշել է Հայաստանի հայրենական ապրանքարտադրողների միության նախագահ Վազգեն Սաֆարյանը:

Նրա խոսքով՝ այդ դեպքում՝ պետք չէր լինի մտածել՝ ինչպես աշխատանքով ապահովել տասնյակ հազարավոր մարդկանց, որոնք այսօր գումար են վաստակում առեւտրով:

«Ոչ մեկի համար գաղտնիք չէ, որ 60-70 հազար մարդ, որոնք զբաղված են ՓՄՁ-ներում, ապահովում են բյուջեի հարկային մուտքերի 2-2,5 տոկոսը: Նշանակում է, ՓՄՁ-ների պահպանումն առաջին հերթին սոցիալական խնդիր է եւ կառավարությունը պետք է այդ ոլորտին թույլ տա ազատ շնչել»,-ասել է Սաֆարյանն ու հավելել. «Եթե պետությունը չի կարողանում, ինչպես խորհրդային ժամանակ, աշխատատեղեր ստեղծել, փող չկրճատի նրանք, որոնք իրենք իրենց են ստեղծվել»:

Եթե փոքր ձեռնարկությունների մեծ մասին ձեռնտու է նախկին սխեման (շրջանառության 3,5 տոկոսը եւ ազատում փաստաթղթաշրջանառությունից), պետք է նման ընտրության հնարավորություն տալ: «Ով ուզում է թող աշխատի հին ձեւով, իսկ ով նախընտրում է 1 տոկոս տոկոսադրույքով եւ խիստ փաստաթղթավորմամբ աշխատել, թող այդպես աշխատի, որպեսզի այդ աշխատատեղերը պահպանվեն»,-ընդգծել է Սաֆարյանը: