Կողբացի 50/2 փողոցի բնակիչները որոշել են ստորագրահավաք անցկացնել «Վահագ Վանցյան» ընկերության կողմից իրականացվող շինարարությունը դադարեցնելու պահանջով, քանի որ կառուցվող շինությունը խոչընդոտելու է շենքի բնակիչների ելումուտը բակ եւ կառուցվում է երեխաների խաղահրապարակի հաշվին։ Այս մասին այսօր՝ հունվարի 31-ին, լրագրողներին ասացին շենքի բնակիչները՝ նշելով, որ իրավական ճանապարհով պայքարելու են իրենց իրավունքների համար:
«Մեր համատիրության իրավաբանի միջոցով կփորձենք պայքարել, որ այս բռի ուրբանիզացումը չլինի: Կպայքարենք, կփորձենք ամեն ինչ անել, որ հաղթենք: Աճուրդը, ես ենթադրում եմ, որ կազմակերպել է քաղաքապետարանը: Եւ եթե մենք իմանայինք, միգուցե մենք բնակիչներով կարողանայինք գնել տարածքը եւ մեզ համար այգի սարքեինք, բայց մենք որեւէ բանի մասին չենք իմացել»,- NEWS.am-ին ասաց համատիրության անդամ Վարուժան Մուրադյանը՝ նշելով, որ շինարարությունը դադարեցնելու պահանջով ստորագրահավաք կիրականացնեն եւ կներկայացնեն Երեւանի քաղաքապետարան:
Երբ բնակիչներն սկսեցին քարերը հետ լցնել նոր փորված տարածքը, մի տղամարդ, որը չնայած բնակիչների պահանջին չցանկացավ ներկայանալ, նշեց, որ վերջիններս իրավունք չունեն ուրիշի սեփականության հետ նման կերպ վարվել:
Շենքի բնակիչների խոսքով՝ կառուցվող շինության մասին իրենք իմացել են 10 օր առաջ, երբ սկսել են փորել շենքին հարակից կանաչ տարածքը:
«Մի քանի օր առաջ շատ պատահական տեսանք, որ տարածքը փակվել է, եւ սկսել են շինարարությունը, այսինքն՝ քանդել են մեր կանաչ տարածքը եւ փակել ելումուտը: Բացի այդ՝ էսթետիկական տեսանկյունից սարսափելի կլինի, եթե այստեղ անմիջապես շենքին կպած կառուցվի եւս մեկ այլ շենք»,- ասաց շենքի բնակիչ Սյուզաննա Արսենյանը:
Բնակիչներին աջակցելու էր եկել նաեւ «Բարեւ Երեւան» խմբակցության անդամ Անահիտ Բախշյանը, որն բնակիչներին հորդորեց ստորագրահավաք անցկացնել եւ պայքարել իրենց իրավունքների համար:
«Ստորագրահավաքը բոլորովին էլ բավարար չէ, բայց բնակիչների կամքը արտահայտող փաստաթուղթ է: Այն, որ աճուրդ է արվել եւ տարածքը վաճառվել է, եւ արդեն սեփականություն է, արդեն ուրիշ դաշտ է տեղափոխվում: Եթե անգամ սեփականություն է, միւենույն է, ինքը ի՞նչ չափորոշիչներ էր պարտավոր բավարարել այս տարածքում որեւէ գործողություն անելու համար: Ինքը չէր կարող կամայական որոշել եւ եւ այսպիսի բան անել, ուղղակի իրավունք չուներ»,- ասաց Անահիտ Բախշյանը:
Նշենք, որ Երեւանի ավագանու «Բարեւ Երեւան» խմբակցության անդամ Անահիտ Բախշյանը հուվարի 30-ին Կողբացի փողոցի բնակիչների ահազանգերի հիման վրա բաց նամակով դիմել էր Երեւանի քաղաքապետին եւ Հայաստանի քաղաքաշինության նախարարին՝ պահանջելով բացատրել անթույլատրելի շինարարության թույլտվության փաստը:
