Լոս Անջելեսի «Bloodvine Media» եւ «Strongman» պրոդյուսերական ընկերությունները հայտարարել են ժամանակակից պատմության ամենասարսափելի իրադարձություններից մեկի թեմայով «1915» հոգեբանական թրիլլերի ստեղծման մասին: «Asbarez» պարբերականի փոխանցմամբ, Հայոց ցեղասպանության թեմայով այս ֆիլմի պրեմիերան 2015 թվականին է:
«1915»-ը սցենարիստ-ռեժիսորներ Կարին Հովհաննիսյանի եւ Ալեք Մուխիբյանի դեբյուտն է գեղարվեստական ֆիլմի ոլորտում: Պրոդյուսերը Թերրի Լեոնարդն է, դերասանները՝ Սիմոն Աբգարյանը, Անժել Սարաֆյանը, Սեմ Փեյջը, Նիկոլայ Կինսկին եւ Ջիմ Պիդոքը:
«1915» ֆիլմը նկարահանվել է Լոս Անջելեսում: Երաժշտությունը գրել է «Գրեմմի» մրցանակի դափնեկիր, աշխարհահռչակ երաժիշտ Սերժ Թանկյանը:
«Ակնկալում ենք, որ «1915»-ը կլինի ավելի, քան պարզապես ֆիլմ: Մենք այն պատրաստել ենք ոչ միայն հանուն արվեստի կամ հաճույքի, այլեւ որպես մարտահրավեր շարունակվող լռությանը, անտարբերությանն ու ժխտողականությանը»,- ասել է համառեժիսոր Կարին Հովհաննիսյանը:
Սյուժեն ծավալվում է Լոս Անջելեսի թատրոնում, որտեղ մի ռեժիսոր 2015 թվականին՝ Հայոց ցեղասպանությունից ուղիղ 100 տարի անց, այդ ողբերգության զոհերի հիշատակին ներկայացում է բեմադրում. սարսափելի հանցագործության, որը մոռացվել եւ մի ամբողջ հարյուրամյակի ընթացքում հերքվում է: Բայց երբ ցուցարարները շրջափակում են նրա թատրոնը, իսկ մի շարք խորհրդավոր իրադարձություններ խուճապ են առաջացնում դերասանների շրջանում, պարզ է դառնում, որ ռեժիսորի առաքելությունն ավելի վիճելի է, քան կարծում են, իսկ անցյալի ուրվականներն ամենուր են: