Կտրուկ վատացել է «Հիմնադիր խորհրդարանի» ներկայացուցիչ, Շուշիի առանձնակի գումարտակի հրամանատար Ժիրայր Սեֆիլյանի ինքնազգացողությունը այսօրվա ավտոերթի ոստիկանական ծեծից հետո: Այս մասին հաղորդում է «Հիմնադիր խորհրդարանի» ֆեյսբուքյան էջը:
«Նա ուժեղ ծակոցներ ունի որովայնի ձախ մասում: Այս պահին նրան տեղափոխում են Վայքի հիվանդանոց»,-ասված է հաղորդագրության մեջ:
«Հիմնադիր խորհրդարանի» անդամ Վարուժան Ավետիսյանը NEWS.am-ի թղթացին հայտեց, որ Վայքի հիվանդանոցում հետազոտել են Ժիրայր Սեֆիլյանին, սոնոգրաֆիա են իրականացրել, պարզվել է, որ ներքին արյունահոսություն չունի եւ այս պահին արդեն մեքենայով Երեւանի ճանապարհին են:
Ավելի վաղ «Հիմնադիր Խորհրդարանը» հայտնել էր, որ Բերձոր չհասած ոստիկանական մեքենաներով անհայտ անձիք հարձակվել են իրենց ավտոերթի մասնակիցների վրա, ծեծի են ենթարկել նրանց, կոտրել բոլոր մեքենաները և դրոշները: Նշվել էր, որ վիրավորվել է «Նոյան Տապան»-ի լրագրողը, նրան տեղափոխել են հիվանդանոց:
«Հիմնադիր խորհրդարանի» անդամ Վարուժան Ավետիսյանը NEWS.am-ի հետ զրույցում հայտնել էր, որ հարձակումից հետո հիվանդանոց է տեղափոխվել 3 անձ: Ծեծի ենթարկվածներից 2-ի՝ ազատամարտիկներ Քերոբ Ղազարյանի եւ Մխիթար Ավետիսյանի առողջական վիճակը ծանր է: