Թուրքիան ինքն էլ գիտակցում է, որ հարկավոր է մեղքը քավելու առիթ գտնել: Այս մասին NEWS.am-ի թղթակցի հետ զրույցում հայտարարեց ՀՀԿ խորհրդարանական խմբակցության ղեկավար Վահրամ Բաղդասարյանը:
Անդրադառնալով Թուրքիայի նախագահ Ռեջեփ Թայիփ Էրդողանի վերջին հայտարարությանը, որում նա խոսել էր Հայոց ցեղասպանության մասին, պատգամավորը նկատեց, որ այնտեղ «արդեն կործանված Օսմանյան կայսրություն» արտահայտությունը կար:
«Այսինքն՝ եթե նրանք պաշտպանեին նախկին Օսմանյան կայսրությունը, նման հայտարարություն չէին անի: Էրդողանը փորձառու քաղաքական գործիչ է եւ հասկանում է, որ եթե ինքը ժամանակին քավի մեղքը, Թուրքիայի համար հերոս կդառնա: Կարծում եմ, որ թուրք ժողովրդի մեծ մասի համար նույնպես ցանկալի կլիներ Հայոց ցեղասպանության 100-րդ տարելիցի նախաշեմին լուծել հարցը»,- կարծիք հայտնեց Վահրամ Բաղդասարյանը:
Ինչ վերաբերում է հարցին, արդյո՞ք թուրքական կողմը չի սպառել իր հակափաստարկները՝ հերթական անգամ հանդես գալով «անկախ պատմաբանների հանձնաժողով» ստեղծելու առաջարկությամբ, պատգամավորն ասաց, որ հայկական կողմը միշտ ընդգծել է. Հայոց ցեղասպանությունը պատմական իրողություն է, եւ մեզ պատմաբանների հանձնաժողով պետք չէ:
Հիշեցնենք, որ թուրքական TNT հեռուստաալիքին տված հարցազրույցում Թուրքիայի նախագահն անդրադարձել էր նաեւ հայկական հարցին՝ հայտարարելով, որ հայկական սփյուռքն իրենց հանգիստ չի պահում: Մեղադրելով սփյուռքին՝ Էրդողանը հիշեցրել էր, որ Թուրքիան միշտ պատրաստակամություն է հայտնել հարցը քննարկել պատմաբանների հետ:
«Մենք ասում ենք. եթե դուք անկեղծ եք, բացենք մեր արխիվները, պատմաբաններին դրանք ուսումնասիրելու, մեզ հաշվետվություն ներկայացնելու հնարավորություն տանք: Իսկ մենք, որպես քաղաքական գործիչներ, նստենք եւ խոսենք: Եթե որեւէ բանի համար վճարելու կարիք կա, մենք կվճարենք, բայց ոչ ոք չի գալիս»,- հայտարարել էր Թուրքիայի նախագահը:
