«Բոկո Հարամ» ծայրահեղ իսլամական խմբավորման զինյալները փետրվարի 1-ին վերսկսել են մարտերը՝ նպատակ ունենալով գրավել Նիգերիայի հյուսիսում գտնվող խոշորագույն քաղաքը՝ Մայդուգուրին: AFP-ի փոխանցմամբ, քաղաքի հարավային ծայրամասում դաժան մարտեր են ընթանում, բնակչության շրջանում խուճապ է:
Մայդուգուրիի շրջանում, որտեղ շուրջ 1 մլն մարդ է բնակվում, մարտերը սկսվել են մեկ շաբաթ առաջ: Այս ընթացքում ավելի քան 100 մարդ է սպանվել: Քաղաքում պարեկային ժամ է գործում:
Ըստ ՌԻԱ Նովոստի գործակալության, անցյալ շաբաթ իսլամականները գրավել են ավելի քան 100 հազար բնակչություն ունեցող Մոնգունո քաղաքը, որը գտնվում է երկրի հյուսիս-արեւելքում:
«Բոկո Հարամը» ձգտում է Նիգերիայի հյուսիս-արեւելքում իսլամական խալիֆայություն ստեղծել, շարիաթի կանոններ մտցնել եւ կանոնավոր կերպով ահաբեկչություններ է իրականացնում երկրում: Արդյունքում Նիգերիայում 5 տարվա ընթացքում ավելի քան 13 հազար մարդ է զոհվել, եւս շուրջ 1.5 մլն բնակիչ հարկադիր տեղահանված եւ փախստական է դարձել:
