Համաշխարհային հանրությունը հնարավորություն ունի Իրանին ստիպել միջուկային ծրագրի շուրջ «ընդունելի համաձայնության» գնալ: CNN հեռուստաալիքին տված հարցազրույցում այս մասին հայտարարել է ԱՄՆ նախագահ Բարաք Օբաման:
Ամերիկյան առաջնորդը, միաժամանակ, կարծում է, որ Իրանի նկատմամբ նոր պատժամիջոցների մասին ԱՄՆ Կոնգրեսում պատրաստվող օրենքը «կխափանի բանակցային գործընթացը»:
«Մենք պետք է ավարտենք այդ գործընթացը եւ Իրանին ստիպենք «այո» ասել ընդունելի համաձայնագրին»,- ասել է Օբաման՝ զգուշացնելով, որ «վետո կսահմանի պատժամիջոցների մասին օրինագծի նկատմամբ» այն դեպքում, եթե այն հասնի իր ստորագրությանը: Նա նաեւ հավելել է, որ «եթե Իրանը չհամաձայնի ընդունելի համաձայնագրին», ինքն անմիջապես որոշում կկայացնի Թեհրանի դեմ լրացուցիչ պատժամիջոցների սահմանման մասին:
«ՌԻԱ Նովոստի»-ն հիշեցնում է, որ միջազգային միջնորդների «վեցյակի» շրջանակում ԱՄՆ-ն բանակցություններ է վարում Իրանի հետ՝ Թեհրանի միջուկային ծրագրի շուրջ: Վարչակազմն ու պետքարտուղարությունը դիմակայում են Կոնգրեսին, որը սպառնում է Իրանի դեմ նոր պատժամիջոցներով:
