Ֆրանսիական «Գրենոբլը» երկիրի գավաթի 1/16-ում սենսացիոն կերպով հաղթեց Մարսելի «Օլիմպիկին»: Չնայած վառ հաղթանակին` 1/8-ում թիմը պարտություն կրեց և դուրս մնաց հետագա պայքարից:
NEWS.am-ի թղթակից Վերա Մարտիրոսյանը զրույցեց «Գրենոբլի» հարձակվող Վահագն Միլիտոսյանի հետ.
Վահագն, «Գրենոբլ» տեղափոխվելուց հետո փակեցիր facebook-ի քո պրոֆիլը: Ինչո՞ վ էր պայմանավորված այդ քայլը:
Ինչ տեղափոխվել եմ «Գրենոբլ», մենակ եմ ապրում: Ինձ կտրել եմ շատ բաներից, այդ թվում և երկար ժամանակ facebook-ից:
Արդեն մի քանի ամիս է «Գրենոբլում» ես: Ի՞նչ կասես թիմի մասին` ինչո՞վ է այն տարբերվում նախորդ թիմից՝ «Լավալից»:
Շատ լավ թիմ է՝ լավ պայմանանորով: Ունենք 20 000 նստարաններով մեծ մարզադաշտ: Տարբերությունն այն է, որ թիմը հանդես է գալիս չորրորդ լիգայում և ընթանում է առաջին տեղով: Եկող տարի արդեն հանդես կգանք երրորդ լիգայում: Հուսով եմ, հաջորդ տարի էլ կլինենք երկրորդում:
Ապագադ այդ թիմի հետ ես կապո՞ւմ:
Դեռ այստեղ եմ: «Գրենոբլին» մեծ նվաճումներ են սպասվում ապագայում: Ֆրանսիայի գավաթի 1/16-ում հաղթեցինք Մարսելի «Օլիմպիկին»: Ուժեղ թիմ է ձևավորվել:
Ինչպե՞ս ստացվեց, որ հաղթեցիք Մարսելի «Օլիմպիկի» պես ուժեղ թիմին, բայց պարտվեցիք երրորդ լիգայի «Բուլոնին»:
«Օլիմպիկի» դեմ խաղում էինք տանը՝ 20 000 հանդիսականի առջև, իսկ «Բուլոնը» նրանց դաշտում: Բայց կարող էինք «Բուլոնին» էլ հաղթել: Պարտվեցինք նվազագույն հաշվով: Մենք շատ էինք ցանկանում խաղալ Առաջին լիգայի թիմի դեմ և ուժեղ հանդես եկանք Մարսելի դեմ, իսկ նրանք շատ հանգիստ ու վստահ եկան մեզ մոտ:
Գո՞հ ես «Գրենոբլում» քեզ հատկացված խաղային ժամանակից:
Գոհ չեմ, բայց իմ դիրքում հանդես է գալիս թիմի լավագուն ֆուտբոլիստ Նասիմ Ակրուրը: Ես հանդես եմ գալիս հաճախ երկրորդ թիմում, բայց առաջին թիմում էլ ինձ հատկացվում է խաղաժամանակ: Գավաթի վերջին խաղին մասնակցեցի:
Եվրոպական ցածր լիգաներում հանդես եկող ֆուտբոլիստները հիմնականում ձգտում են խաղալ Ռուսաստանում, քանի որ այնտեղ լավ են վարձատրում: Նման ցանկություն քեզ մոտ չի՞ եղել:
Եթե գնամ Ռուսաստան, ապա միայն խաղալու համար, այլ ոչ փողի: Ֆրանսիայում էլ վատ չեն վարձատրում:
Որքա՞ն է կազմում լավ աշխատավարձը Ֆրանսիայում:
Կախված է լիգայից ու ֆուտբոլիստից: Բայց Դուք էլ գիտեք, որ ֆուտբոլիստներին լավ են վարձատրում ամեն տեղ:
Կարծո՞ւմ ես: Անգամ Հայաստանո՞ւմ:
Հայաստանի մասին չգիտեմ, բայց կարծում եմ, որ ֆուտբոլիստը պետք է մտածի ոչ թե փողի, այլ խաղի մասին: Եթե լավ խաղաս, պայմանագրեր կլինեն:
Վահագն, նախորդ տարի միացար ազգային հավաքականին` Շվեյցարիայում: Մինչ այդ Ֆրանսիայում երիտասարդական հավաքականին էիր միացել, բայց Հայաստան չես կարողանում գալ, քանի որ թղթաբանական խնդիրներ ունես: Ե՞րբ կլուծվեն դրանք:
Հուսով եմ՝ շուտով ամեն ինչ կկարգավորվի:
Կարծում ես, եթե լավ հանդես գաս, մի օր կհրավիրվե՞ս հավաքական:
Չգիտեմ, ես դեռ երիտասարդ եմ ու ժամանակ ունեմ ինձ դրսևորելու: