Ահաբեկիչների նպատակը ոչ միայն Ֆրանսիան էր, այլ նաեւ ժողովրդավարության, հարգանքի, խոսքի ազատության եւ մարդու իրավունքների սկզբունքները։ Այս մասին փետրվարի 4-ին մամուլի ասուլիսի ժամանակ հայտարարել է Հայաստանում Ֆրանսիայի դեսպան Ժան Ֆրանսուա Շարպանտիեն՝ մեկնաբանելով «Շառլի Էբդո» ամսագրի խմբագրատանը տեղի ունեցած ողբերգական իրադարձությունները։
Նրա խոսքով՝ հենց այդ պատճառով Ֆրանսիային պատած հուզական շոկը հատկապես սուր էր։ «Կատարվածը այնքան սուր հուզումներ առաջ բերեց, որ ֆրանսիացիների բողոքը դրսեւորվեց տասնյակ հազարավոր քաղաքացիների ցույցի տեսքով։ Հանրապետության բնակիչները իրենց աջակցությունն հայտնեցին խոսքի եւ կարծիքի ազատությանը»,- հայտարարեց դեսպանը՝ հիշեցնելով, որ ցույցերին մասկացել են տարբեր երկրներից հրավիրված ներկայացուցիչներ։ Հայաստանը ներկայացնում էր արտգործնախարար Էդվարդ Նալբանդյանը։ «Ես շնորհակալ եմ նրան ցույցերին մասնակցելու համար, ինչպես նաեւ երախտապարտ եմ Հայաստանում իրենց ցավակցությունը հայտնած բոլոր մյուսներին»,- հայտարարեց դեսպանը։
Միաժամանակ, ֆրանսիացի դիվանագետը արձանագրեց, որ ահաբեկիչներին չեզոքացնելը չի լուծել խնդիրները։ «Կրոնական մոլեռանդություն կա ինչպես Ֆրանսիայում, այնպես էլ նրա սահմաններից դուրս։ Դրա համար էլ անհրաժեշտ է համատեղ պայքար մղել ահաբեկչության դեմ։ Սպառնալիքը դեռ մնում է։ Ֆրանսիայի իշխանությունները որոշում են կայացրել առավել վճռական լինել ահաբեկիչների դեմ պայքարում եւ ընդլայնել համագործակցությունն այդ ոլորտում։ Ահաբեկչության դեմ միջազգային պայքարն այսօր առավել, քան երբեւէ արդիական է»,- նշեց դեսպանը։
