Վերջին տարիներին ֆուտբոլիստների անձնական կյանքն սկսել է ավելի շատ հետաքրքրել երկրպագուներին ու լրագրողներին: Գաղտնիք չէ, որ հայտնի ֆուտբոլիստները նախընտրում են իրենց կողքին ունենալ գեղեցիկ մոդելների կամ երգչուհիների: Աշխարհի լավագույն ֆուտբոլիստ Կրիշտիանու Ռոնալդուն մինչեւ Իրինա Շեյքի հետ հանդիպելը հայտնի էր որպես սրտակեր` հաճախակի ընկերուհիներ փոխող տղամարդ: Իրինայի հետ բաժանումից հետո, նա կրկին վերադարձավ իր հիմնական կենսակերպին: Բայց կան ֆուտբոլիստներ, որոնք երկար տարիներ իրենց սիրելիների կողքին են` համարվելով իդեալական զույգեր:
Սիրահարների միջազգային օրվա առթիվ NEWS.am-ը ներկայացնում է ամենագեղեցիկ ֆուտբոլային զույգերին.
Կակա և Սելիկո
Ֆուտբոլիստ Կական իր կյանքի սիրուն հանդիպել է 2002-ին: Կարոլինա Սելիկոն հայտնի մարդկանց դուստր է և տիրապետում է հինգ լեզուների: Քանի որ Կական քրիստոնյա է, նա սպասեց, մինչեւ իր ընտրյալն ավարտեց դպրոցն ու նոր միայն ամուսնացան: Ֆուտբոլիստը դեմ էր ոչ պաշտոնական կարգավիճակով համատեղ կյանքին, կամ ինչպես ասում են` «քաղաքացիական ամուսնությանը»: Զույգն արդեն տասը տարի միասին է: Սակայն վերջերս լուրեր էին հայտնվել, թե ֆուտբոլիստը լքել է կնոջը` հանուն Միսս Բրազիլիայի: Կական և Սելիկոն չմեկնաբանեցին այդ լուրերը, այլ միայն իրենց Instagram-ի էջերում տեղադրեցին ընտանիքի երջանիկ լուսանկարներ, իսկ վերջերս նշեցին ծանոթության 13 տարին:
Դևիդ և Վիկտորիա Բեքհեմներ
Բեքհեմներն առաջին զույգն էր ֆուտբոլում, որն իրենց անձնական կյանքը դուրս բերեցին ֆուտբոլային աշխարհից այն կողմ: Դևիդը դարձավ ամենաճանաչված մարդկանցից մեկն աշխարհում, ինչպես նաև` ամենագլամուրային ֆուտբոլիստը: Բեքհեմի յուրաքանչյուր նոր սանրվածք ավելի շատ էր քննարկվում մամուլում, քան Անգլիայի հավաքականի խաղերը: «Մանչեսթեր Յունայթեդի» նախկին մարզիչ՝ լեգենդար Ալեքս Ֆերգյուսոնն իր ինքնակենսագրական գրքում նշում է, որ հենց սկզբից էլ կողմ չէր այդ զույգի հարաբերություններին: Ըստ շոտլանդացու՝ Վիկտորիան կործանեց Բեքհեմի ֆուտբոլային կարիերան: Զույգն արդեն 16 տարի՝ միասին է և դաստիարակում է չորս երեխա:
Պիկե և Շակիրա
Երբ 2010-ին հայտնի դարձավ, որ կոլումբացի հայտնի երգչուհի Շակիրան հանդիպում է Բարսելոնայի պաշտպան Ժերարդ Պիկեի հետ, բոլորը հոռետեսորեն տրամադրվեցին այս զույգի նկատմամբ: Շակիրան 10 տարով մեծ է Պիկեից, 40 սմ ավելի ցածրահասակ է, Պիկեն աչքի չի ընկնում հավատարմությամբ և այլն… Անցել է 5 տարի, և զույգն արդեն երկու զավակ է դաստիարակում: Շակիրան «Կամպ Նոու» մարզադաշտի ամենասպասված հյուրն է:
Բուֆոն և Սերեդովա
Հազարավոր աղջիկների երազանք համարվող իտալացի դարպասապահ Ջանլուիջի Բուֆոնի սիրտը կարողացավ գերել չեխ մոդել Ալյոնա Սերեդովան: Բուֆոնը խոստացավ ամունանալ իր ընտրյալի հետ, եթե 2006-ին Իտալիան դառնա աշխարհի չեմպիոն: Տղամարդն ասաց և պահեց իր խոսքը: Այսօր նրանք օրինակելի զույգ են:
Զիդան և Վերոնիկա Ֆերնանդես
Բոլոր ժամանակների լավագույն ֆուտբոլիստներից մեկը՝ Զինեդին Զիդանը, իր կյանքի սիրուն հանդիպեց պատահական: Վերոնիկան, ով այդ ժամանակ բալետի պարուհի էր, երեկոյան աշխատում էր սուպերմարկետում: Այդ օրը նրա հերթափոխը չէր, նա փոխարինում էր ընկերուհուն: Զիդանը մտնում է խանութ և տեսնելով Վերոնիկային` միանգամից սիրահարվում: Ասում են՝ Զիզուն շատ ամաչկոտ մարդ է: Երկու տարի անց միայն զույգն սկսում է միասին ապրել: Զիդանին Ֆրանսիայում մեծարում են ոչ միայն իր ֆուտբոլային տաղանդի և ֆրանսիական ֆուտբոլում ունեցած ավանդի, այլ նաև նրա համար, թե ինչպիսի քնքշությամբ և ուշադրությամբ է նա միշտ վերաբերվում իր ընտանիքին: Այսօրվա Ֆրանսիայում նման գեղեցիկ և ամուրը ընտանիքն իսկապես հարգանքի է արժանի:
Մեսի և Անտոնելա Ռակուցո
Մեսին Անտոնելային գիտեր դեռ մանկուց: Ռակուցոն ո´չ մոդել է, և ո´չ էլ հայտնի մարդ: Նրանց ընտանիքները շատ մտերիմ էին, սակայն Անտոնելան սիրում էր ուրիշ տղամարդու: Նրանք պատրաստվում էին լրջացնել հարաբերությունները, երբ դժբախտ պատահարի հետեւանքով նրա ընտրյալը մահացավ: Մեսին այդ դժվար պահին Անտոնելայի կողքին էր և օգնեց նրան ամեն ինչում: Աղջիկը գնահատեց այդ քայլը, և նրանք սկսեցին հանդիպել: Այսօր զույգն անբաժան է: Մեսին սոցիալական ցանցերում սիրով կիսվում է իր ընտանեկան երջանկությունը վկայող լուսանկարներով: Զույգն ունի մեկ զավակ:
Ուեսլի Սնեյդեր և Իոլանտա Կաբաու
Հոլանդիայի ամենասեքսուալ կանանցից մեկը՝ Իոլանտա Կաբաուն, Հոլանդիայի հավաքականի կիսապաշտպան Ուեսլի Սնեյդերի կինն է: Չնայած ծանոթության պահին Սնեյդերն ամուսնացած էր, դա նրան հետ չպահեց երազած կնոջը հասնելու համար: Հետագայում Ուեսլին հաճախ պատմում էր, որ դա իր կյանքի ամենադժվար պահերից մեկն էր, և որ Իոլանտան կարողացավ իրեն բուժել: Կինը հոգեպես հավասարակշռություն բերեց Ուեսլիին: Ուեսլին սկսեց հավատալ Աստծուն և իրեն ավելի երջանիկ զգալ: