Տնտեսական վերջին ճգնաժամն առաջին հայացքից բավական հակասական հետեւանքի հանգեցրեց: Պարզվում է՝ հարուստներն ավելի հարուստ են դարձել, իսկ աղքատները՝ ավելի աղքատ: Դատելով «բնակչության» ավանդների աճի հսկայական եւ վերջին տարիներին մանրածախ ապրանքաշրջանառության կրիայի տեմպերից, Հայաստանն այդ իմաստով երջանիկ բացառություն չկազմեց:
Շվեյցարական «Credit Suisse» բանկը հետաքրքիր հաշվարկ է կատարել: Եթե աշխարհի ամբողջ բնակչությունը երկու հավասար մասի բաժանենք, ապա վերին հատվածում հայտնվելու համար հարկավոր է տարեկան ավելի քան 3.650 դոլար եկամուտ ունենալ (կամ ամսական 145 հազար դրամ): Նշենք, որ սա զուտ մեխանիկական բաժանում է, եւ վերեւի հատվածում լինելն ամենեւին չի նշանակում հարուստների դասին պատկանել:
Բայց նույնիսկ այդ դեպքում մեր բնակչությունն ընդհանուր առմամբ չի կարող հայտնվել վերին հատվածում: Պաշտոնական տվյալներով, «ամենահարուստների» եկամուտը 2013 թվականին կազմել է ամսական 130.600 դրամից քիչ ավելի՝ բնակչության մեկ շնչի հաշվարկով: Այդ դեպքում, ի՞նչ ասել «ամենաաղքատների» մասին, որոնց մոտ այդ ցուցանիշը չի հասնում նույնիսկ 8.500 դրամի: Բայց հասկանալի է, որ հեղինակավոր խմբում կարող են ընդգրկվել մեր իսկական հարուստները (որոնք բյուջետային հետազոտությանը չեն մասնակցում), ընդ որում՝ ոչ ամենացածր հատվածներում:
2014 թվականը մեծացրեց մեր երկրի հարուստների եւ աղքատների միջեւ անդունդը: Նման եզրահանգում կարելի է անել՝ ելնելով անցյալ տարվա դեկտեմբերին մանրածախ ապրանքաշրջանառության ֆիզիկական ծավալների զգալի անկումից:
Դեպի աղքատության շեմն անցումը մեծապես պայմանավորված էր նաեւ Ռուսաստանից դրամական փոխանցումների կրճատմամբ: Այս դեպքում երկու գործոն ազդեց. արգելվեց այդ երկիր Հայաստանից աշխատանքային միգրանտների մուտքը, ինչպես նաեւ երկու երկրներում արտարժույթի փոխարժեքի անկում արձանագրվեց:
Հասկանալի է, որ աշխատանքային միգրանտների հետ կապված խնդիրն անհապաղ լուծում է պահանջում: Նաեւ այլ խնդիր կա՝ մոտ ապագայի համար: Ներմուծման ծավալներով մեզ համար ամենախոշոր ապրանքը՝ ռուսական բնական գազը, ընթացիկ տարում կարող է եվրոպական երկրների համար մեկ երրորդով էժանանալ: Այդ դեպքում արդարացված կլիներ նաեւ մեր կողմից պահանջել էժանացնել ինչպես ռուսական գազը, այնպես էլ ներքին սակագները: Չէ՞ որ բավական թանկացած այդ էներգակիրը բառացիորեն խժռում է մեր քաղաքացիների ընտանեկան բյուջեի մի մասը:
