Վրաստանի նախագահ Գեորգի Մարգվելաշվիլին վստահ է, որ Թբիլիսին եւ Կիեւը կկարողանան խուսափել Ուկրաինայի նախագահի արտահաստիքային խորհրդականի եւ Պյոտր Պորոշենկոյին առընթեր Բարեփոխումների միջազգային խորհրդի նախագահի պաշտոնում Սահակաշվիլիի նշանակման հետեւանքով հնարավոր տարաձայնություններից:
«Կարծում եմ՝ որոշակի անհարմարություն է ստեղծվում, բայց ելնելով այն հանգամանքից, որ Ուկրաինայի կառավարությունն իր ժողովրդից մանդատ է ստացել Վրաստանի հետ բարիդրացիական հարաբերությունների համար, իսկ մենք մանդատ ունենք Վրաստանի ժողովրդից՝ ուկրաինական ժողովրդի հանդեպ մեծ սիրո եւ աջակցության համար, մենք կկարողանանք խորացնել այդ հարաբերությունները»,- «Ռուսթավի 2» հեռուստաալիքի եթերում հայտարարել է Մարգվելաշվիլին:
Փետրվարի 17-ին Վրաստանի գլխավոր դատախազությունը Ուկրաինայի գլխավոր դատախազությանը միջնորդություն է ներկայացրել նախկին նախագահ Միխայիլ Սահակաշվիլիին եւ արդարադատության նախկին նախարար Զուրաբ Ադեիշվիլիին ձերբակալելու ու Թբիլիսիին արտահանձնելու վերաբերյալ:
Ըստ «Նովոստի Գրուզիա»-ի, Սահակաշվիլին Վրաստանից հեռացել է նոր նախագահ Գեորգի Մարգվելաշվիլիի կողմից այդ պաշտոնը ստանձնելուց հետո՝ 2013 թվականի նոյեմբերին, եւ այդ ժամանակից ի վեր չի վերադարձել հայրենիք: Վրաստանի գլխավոր դատախազությունը 2014 թվականին հեռակա կարգով Սահակաշվիլիին մեղադրանք է առաջադրել մի քանի քրեական գործերի շրջանակում. անձնական կարիքների համար շուրջ 5 մլն դոլարի չափով պետական միջոցներ վատնելու, 2007 թվականի նոյեմբերի 7-ի ակցիան ցրելու գործով պաշտոնեական լիազորությունները չարաշահելու, պատգամավոր Վալերի Գելաշվիլիին ծեծելու եւ 2006 թվականին «Վրաստանի միացյալ բանկի» աշխատակից Սանդրո Գիրգվլիանիին սպանելու համար: Նախկին նախագահի նկատմամբ հետախուզում է հայտարարվել: