Երկրի առաջին նախագահին սազական հայտարարություն չէր: Լեւոն Տեր-Պետրոսյանի «Սրտիս խոսքը» հոդվածում առկա հայտարարությունը, թե «ԲՀԿ-ի ներսում խառնակիչների խումբ կա», այսպես մեկնաբանեց Ազգային ժողովի ԲՀԿ խմբակցության պատգամավոր Վահան Բաբայանը:
«Չեմ ցանկանում մեկնաբանել Լեւոն Տեր-Պետրոսյանի հայտարարությունները: Եթե նույնիսկ նման բան արտահայտում էր, ապա ինքը պարտավոր էր անուններ հնչեցնել, ոչ թե մեղադրանքներ հնչեցնել: Կամ ավելի շուտ դրա մասին մտահոգություններ թող հայտներ: Ընդհանրապես սա սազական չէ, անիմաստ բաներ էր, ես լուրջ չեմ վերաբերվում»,- ասաց Վահան Բաբայանը:
ԲՀԿ-ական պատգամավորի համար զարմանալի է «խառնակիչների խումբ» արտահայտությունը: Նրա խոսքով՝ ԲՀԿ-ն արժանի է այն գնահատականներին, որոնք ԲՀԿ նախագահը հնչեցրել է իր վերջին ելույթում:
«Ի՞նչ է նշանակում խառնակիչների խումբ: Եթե մարդիկ դեմ են ցնցումներին, դեմ են ոչ կոնստրուկտիվ մոտեցումներով իշխանության ձգտելուն, ուրեմն այդ մարդիկ խառնակիչնե՞ր են: Ես չեմ կարողանում ճիշտ ընկալել»,- ավելացրեց նա:
Նշենք, որ փետրվարի 19-ին հրապարակված իր հոդվածում առաջին նախագահը մասնավորապես ասել էր. «Այդ սխալների մի մասը գալիս է Ծառուկյանի քաղաքական փորձառության պակասից, իսկ մեծագույն մասը՝ ԲՀԿ-ի ներսում գործող խառնակիչների մի փոքրիկ խմբակից, որն ուղղորդվում է բոլորովին մի այլ կենտրոնից եւ հետամուտ է բոլորովին մի այլ ծրագրի։ Թե՛ Ծառուկյանին, թե՛ Բարգավաճ Հայաստանին, եւ թե՛ Համաժողովրդական շարժմանը ոչ ոք այնքան վնաս չի տվել, որքան այդ խմբակի՝ մեծ վերլուծաբանների հավակնություն ունեցող մի քանի անդամները։ Ես անուններ չեմ տալիս, որովհետեւ խառնակչությունը շարունակելու պարագայում այդ մարդիկ իրենք իրենց կմատնեն եւ բոլորը կկռահեն, թե ում մասին է խոսքը»:
