Վաղ թե ուշ Սերժ Սարգսյանը կորցնելու է նախագահի պաշտոնը։ Այս մասին փետրվարի 23-ին խորհրդարանի նիստի ժամանակ հայտարարել է «Ժառանգություն» խմբակցության պատգամավոր Զարուհի Փոստանջյանը։
Նա պատգամավորներին կոչ է արել կողմ քվեարկել Հայաստանի նախագահին իմպիչմենտ հայտնելու նախաձեռնությանը։ «Միեւնույն է, նա վաղ թե ուշ կորցնելու այդ պաշտոնը, մեր ժողովրդի համբերությունն անսպառ չէ։ Իսկ շատ ուղղիչ աշխատանքային հաստատություններում՝ Կոշում, Արթիկում եւ այլն...»,- այս խոսքի վրա Փոստանջյանի ելույթն ընդհատել է ԱԺ փոխխոսնակ Էդուարդ Շարմազանովը։ «Ամեն բան չափ ու սահման ունի»,- հայտարարել է նա:
Նշենք, որ նախաձեռնության հեղինակ, ՀԱԿ պատգամավոր Նիկոլ Փաշինյանի ելույթը Շարմազանովը չէր ընդհատել։ Հանրապետական կուսակցության իր գործընկերների զարմանքին ի պատասխան՝ Շարմազանովը ընդգծել էր, որ պատգամավորը՝ իբրեւ օրինագծի հեղինակ, այն մանրամասն ներկայացնելու իրավունք ունի։
