ՀՀ խորհրդարանից հայ-թուրքական արձանագրությունների հետկանչն այս պահին ոչ մի նշանակություն չունի, քանի որ նրանք արդեն խաղացել են իրենց դրական դերը Թուրքիայի համար։ Այս մասին փետրվարի 23-ին մամուլի ասուլիս ժամանակ հայտարարել է ՀՀ խորհրդարանի արտաքին կապերի խորհրդարանական հանձնաժողովի նախկին ղեկավար Հովհաննես Իգիթյանը։
Ըստ նրա՝ հայ-թուրքական արձանագրությունները հայկական կողմի նախաձեռնությունը չեն եղել, եւ ի սկզբանե դրանց հետ կապված ողջ գործընթացը Հայաստանի համար սխալ հունով էր ընթանում։ «Պարզ էր, որ Թուրքիան պետք է ծառայեցնի այդ արձանագրություններն իր շահերին։ Կարծում եմ, ավելի ճիշտ կլիներ արձանագրությունները թողնել օրակարգում, քանի որ միջազգային որոշ ուժեր դա կարող են դիտարկել որպես Հայաստանի կողմից ինչ-որ գործընթացի ձախողմանն ուղղված քայլ»,- կարծիք է հայտնել Իգիթյանը։
Հիշեցնենք, որ Հայաստանի եւ Թուրքիայի միջեւ չկան դիվանագիտական հարաբերություններ։ Իսկ հայ-թուրքական սահմանը փակվել էր 1993թ. ԱՆկարայի նախաձեռնությամբ։
Հայ-թուրքական հարաբերությունների բարելավման գործընթացը սկսվեց 2008 թվականի աշնանը ՀՀ նախագահ Սերժ Սարգսյանի նախաձեռնությամբ: 2009-ի հոկտեմբերի 10-ին Հայաստանի եւ Թուրքիայի ԱԳ նախարարներ Էդվարդ Նալբանդյանն ու Ահմեդ Դավութօղլուն Ցյուրիխում «Դիվանագիտական հարաբերությունների մասին արձանագրություն» եւ «Երկկողմ հարաբերությունների զարգացման մասին արձանագրություն» ստորագրեցին, որոնք պետք է վավերացվեին երկու երկրների խորհրդարանների կողմից:
Սակայն արդեն 2009 թվականի դեկտեմբերին Թուրքիայի վարչապետ Ռեջեփ Թայիփ Էրդողանը հայտարարեց, որ Անկարան արձանագրությունները չի վավերացնի՝ առանց ղարաբաղյան հակամարտության կարգավորման: 2010 թվականի ապրիլի 22-ին Սերժ Սարգսյանը հայտարարեց հայ-թուրքական արձանագրությունների վավերացման գործընթացը առկախելու մասին՝ փաստելով, որ Թուրքիան պատրաստ չէ շարունակել սկսված գործընթացը:
Նշենք, որ ՀՀ նախագահ Սերժ Սարգսյանը 2015թ. փետրվարի 16-ին նամակով դիմել է ՀՀ ԱԺ նախագահ Գալուստ Սահակյանին՝ տեղեկացնելով Հայաստան-Թուրքիա արձանագրությունները ՀՀ ԱԺ-ից հետ կանչելու վերաբերյալ իր որոշման մասին:
