Իշխանությունը ներկայացնող պատգամավորների մեծ մասի համար բոլորովին անտեղի է խոսել կոռուպցիայի մասին: Այս մասին, այսօր՝ փետրվարի 23-ին խորհրդարանում հայտարարել է ՀԱԿ խմբակցության ղեկավար Լեւոն Զուրաբյանը՝ երկրում պետական կառավարման ճգնաժամի մասին հայտարարության նախագծի ներկայացման ժամանակ:
Նրա խոսքով՝ իշխանական շրջանակները խրվել են կոռուպցիայի մեջ:
ՀՀԿ խմբակցության պատգամավոր Խոսրով Հարությունյանի հարցին՝ միթե դուք չեք կարող հիշել իշխանության կողմից կոռուպցիայի դեմ պայքարի օրինակներ, Զուրաբյանը պատասխանել է. «Կառավարման սանձերը ձեր ձեռքին են: Կառուցեք առողջ երկիր: Իսկ կոռուպցիայի համար մեղավոր է իշխանությունը, այդ թվում անձամբ դուք: Դուք կարծում եք, որ Երեւանում կան մարդիկ, որոնք չգիտե՞ն, թե ինչ բիզնես ունի Խոսրով Հարությունյանը (լուրերի համաձայն՝ գազալցակայան-խմբ): Դե թող որեւէ մեկն ասի, թե ես ինչ բիզնես ունեմ»:
Ի պատասխան Խոսրով Հարությունյանն արձագանքել է. «Սիրելիս, համեմատեք, թե ինչպես եմ հագնված ես եւ ինչպես եք հագնված դուք: Նշանակում է, որ դուք էլ եք կոռուպցիոներ»: