Գերմանիայում մեկնարկել է 94-ամյա մի տղամարդու դատավարությունը, որին կասկածում են Օսվենցիմի կալանավորների սպանության մեջ մասնակցություն ունենալու համար։ Այս մասին գրում է The Independent-ը։
Տղամարդը, որի անունը չի հրապարակվում իրավաբանական պատճառներով, մեղադրվում է նացիստական ճամբարում 3681 մարդու սպանության մեջ մասնակցություն ունենալու համար։
Հետաքննության տվյալներով՝ կասկածյալը Երկրորդ համաշխարհային պատերազմի տարիներին ծառայել է նացիստական Գերմանիայի բանակի շարքերում եւ ունեցել է սերժանտի կոչում։ Լեհաստանի տարածքում գտնվող համակենտրոնացման ճամբարում կասկածյալը հիվանդանոցում սանիտար է աշխատել։ Այս մասին հայտնել է Գերմանիայի Շվերին քաղաքի դատախազության մամուլի խոսնակը, գրում է Gazeta-ն։ Կասկածյալի փաստաբանը հայտարարել է, որ հետաքննությունը իր հաճախորդի մեղքն ապացուցող ոչ մի փաստ չունի։