«Էմմի»-ի եռակի դափնեկիր, կոմպոզիտոր Դենիզ Ջենտիլինին եւ երգերի հանրահայտ հեղինակ Լիզա Նեմզոն «I Am Alive» անվանումով մյուզիքլ են բեմադրելու՝ նվիրված Հայոց ցեղասպանության 100-րդ տարելիցին: Այս մասին նշված է KDVR-TV FOX Denver հեռուստաալիքի կայում:
Մյուզիքլի սյուժեի հիմքում Հայոց ցեղասպանությունը վերապրած Գուրգեն եւ Մալվին Խանջյանների՝ Ջենտիլինիի տատիկի եւ պապիկի 75-ամյա սիրո պատմությունն է: «Իմ պապը՝ Գուրգենը, 8 տարեկանում որբացել է: Նրա հայրը սպանվել է Թուրքիայում, 1915 թվականին: Ընտանիքի մյուս անդամների հետ նման ուղարկել են, այսպես կոչված «մահվան երթի». սիրիական անապատով ոտքով երթ դեպի համակենտրոնացման ճամբարներ: Սակայն թուրքերից մեկը խղճացել է նրան: Նա փրկել է պապիս եւ տեղավորել որբանոցում: Դրանից հետո պապիկս այդպես էլ չի տեսել իր ընտանիքին: Տատիկս՝ Մալվինը, նույնպես Թուրքիայում է բնակվել: Նրա հորը թունավորել են, եւ քանի որ մայրը չի կարողացել պահել բոլոր քույրերին ու եղբայրներին, Մալվինին տվել է այլ ընտանիքի: Երբ հայերին տեղահանել են Թուրքիայից, Գուրգենն ու Մալվինը հայտնվել են Հունաստանի փախստականների ճամբարում, որտեղ էլ ծանոթացել են: Երբ Մալինը 14 տարեկան է եղել, իսկ Գուրգենը՝ 19, նրանք ամուսնացել են եւ միասին շուրջ 75 տարի ապրել»,- պատմել է Ջենտիլինին:
Ջենտիլինիի խոսքով, ինքը վաղուց գիտեր այդ պատմությունը, բայց հենց այս տարի որոշեց խոսել այդ մասին: «Ապրիլին նշվում է Հայոց ցեղասպանության 100-րդ տարելիցը, եւ ես կցանկանայի այդ պատմությունն այլ կերպ ներկայացնել: Ներկայացումներ են բեմադրվել, ֆիլմեր նկարահանվել, բայց ես երբեք չեմ լսել, որ մյուզիքլ բեմադրվի: Ես հավատում եմ, որ երաժշտությունը համընդհանուր լեզու է, այնպես որ՝ նույնիսկ նրանք, ովքեր այդ իրադարձությունների մասին ոչինչ չգիտեն, կարող են հետաքրքրվել դրանցով»,- նշել է կոմպոզիտորը:
